कुम्भमेला गएका नेपाली बोकेको गाडी भारतमा दुर्घटना, ५ जनाको मृत्यु

काठमाडौँ- भारतमा भएको सवारी दुर्घटनामा ५ नेपालीको मृत्यु भएको छ।

भारतको बिहारस्थित मुजफ्फरपुरमा शनिबार भएको दुर्घटनामा उनीहरूको मृत्यु भएको हो। बीआर ३२ प ४६६१ नम्बरको स्कोर्पियो दुर्घटनामा परेको हो।

घटनास्थल धनुषामा पर्ने नेपाल-भारत सीमा नजिकै पर्छ। जिल्ला प्रहरी कार्यालय धनुषालाई दुर्घटनाबारे भारतीय पक्षले धनुषा प्रहरीलाई जानकारी गराएको थियो।

दुर्घटनामा परी मृत्यु हुनेमा अर्चना ठाकुर, कनतारनी देवी, बालकृष्ण झा र इन्दु देवी छन्। गाडीका चालक पनि नेपाली नै भएको र उनको पनि मृत्यु भएको तर  नाम नखुलेको धनुषा प्रहरीको भनाइ छ।

दुर्घटनामा मनोहर ठाकुर, कामिनी झा , सृष्टि ठाकुर र जगतारण देवी घाइते भएका छन्। मृतक तथा घाइते कुम्भमेलामा गएर फर्किँदै गरेकाहरु भएको धनुषा प्रहरीको भनाइ छ। घाइतेहरुको स्थानीय श्रीकृष्ण मेडिकल कलेजमा उपचार भइरहेको छ।

मृतक र घाइतेहरु महोत्तरीको हर्दिया र धनुषाको जनकपुरका भएको धनुषा प्रहरीको भनाइ छ।