सभामुखसँग किन रिसाइन् सुमना श्रेष्ठ?

काठमाडौँ– सभामुख देवराज घिमिरेले मंगलबार प्रतिनिधि सभाको शून्य समयमा बोल्न बोलाउँदा पनि राष्ट्रिय स्वतन्त्र पार्टीकी सांसद सुमना श्रेष्ठले बोल्न अस्वीकार गरेकी छन्।

मंगलबारको प्रतिनिधि सभा बैठकमा सभामुखले बोलाउँदा सांसद श्रेष्ठ नबोलेपछि सभामुख घिमिरेले दोस्रो पटक बोलाएका थिए। त्यसमा पनि नबोलेपछि तेस्रो पटक बोलाए। त्यसमा पनि नबोलाएपछि अर्का सांसदलाई बोल्नका लागि समय दिए।

यसअघि सोमबार सुमनाले भारतको ओडिसा राज्यको भुवनेश्वरस्थित कलिङ इन्स्टिच्युट अफ इन्डस्ट्रियल टेक्नोलोजी (केआईआईटी) मा प्रकृति लम्सालको मृत्युबारे कुरा उठाउन खोजेकी थिइन्। तर सभामुख घिमिरेले समय दिएका थिएनन्। सभामुखले आफूले चाहेका बेला समय नदिएको भन्दै उनले सभामुखले दिएको समयमा बोल्न अस्वीकार गरेकी हुन्।

सोमबार पटकपटक बोल्न खोज्दा पनि समय नपाएपछि उनी संसद् बैठक बहिष्कार गरेर बाहिरिएकी थिइन्।

संसद् बैठक बहिष्कार गरेर निस्किएपछि उनले भारतको भुवनेश्वरस्थित कलिङ्गा इन्स्टिच्यूट अफ इन्डस्ट्रियल टेक्नोलोजीमा ज्यान गुमाएकी नेपाली विद्यार्थी प्रकृति लम्साल र त्यहाँबाट निकालिएका नेपाली विद्यार्थीको बारे बोल्न खोज्दा समय नपाएको भन्दै आपत्ति प्रकट गरेकी थिइन्।

‘यो विषय आकस्मिक समयमा उठाउन आवश्यक ठान्नु भएन सभामुखले। बरु प्रधानमन्त्रीलाई कस्तो प्रश्न सोध्ने भन्ने विषय बढी महत्त्वपूर्ण ठान्नुभयो,’ उनले सामाजिक सञ्जालमा लेखेकी छन्।

उता सभामुखको सचिवालयले भने श्रेष्ठ र सोविता गौतमले संसदीय प्रक्रियाभन्दा बाहिर गएर अनावश्यक प्रचारबाजी गरेको भन्दै असन्तुष्टि जनाएको छ। सदनको प्रक्रियामा अगाडि बढ्दा बाहिर प्रचारबाजी भएको भन्दै सभामुखले चिन्ता व्यक्त गरेको उनको निजी सचिवालयले जनाएको छ। सभामुखको सचिवालयको विज्ञप्तिका कारण पनि उनले सभामुखप्रति रोष प्रकट गरेकी हुन्।

सोविताले माघ २७ गते पारित भएको विधायन सम्बन्धमा व्यवस्था गर्न बनेको विधेयकबारे बोल्न माघ २८ गते आकस्मिक समय मागेकी थिइन्। सभामुखले विधेयक पारित भइसकेका आकस्मिक विषय हुन नसक्ने बताएका थिए।

विधेयक पारित गर्नुअघि नै सभामुखले कानून मन्त्री, उपसभामुख तथा प्रमुख पाँच दलका प्रमुख सचेतकसँग छलफल गरेको र त्यहीँ भएको सहमति अनुसार नै विधेयक अगाडि बढाएको भने पनि उनले प्रोसेस बिग्रिएको भन्दै बोल्न मागेकी थिइन्। तर, गौतमले बोल्न चाहेको विषय आकस्मिक नहुने भन्दै अरु नै विषय भए राख्न सक्ने जानकारी सभामुखले गराएका थिए।