लन्डनमा नेपाली सेना दिवसको भव्य कार्यक्रम, बेलायती सेना-प्रमुख पनि सहभागी

लन्डन- लन्डनस्थित नेपाली दूतावासले २६२औँ नेपाली सेना दिवसको अवसरमा दूतावासमा बुधबार भव्य कार्यक्रम सम्पन्न भएको छ। कार्यक्रमको प्रमुख अतिथिमा ब्रिटिस सेनापति चिफ अफ द जनरल स्टाफ जनरल सर रोली वाकर उपस्थित थिए।

नेपाली सेना दिवसको कार्यक्रममा बेलायती सेनाप्रमुख सहभागी भएको यो पहिलो पटक भएको दाबी गरिएको छ। समारोहमा नेपाली सेनाको गतिविधिहरू प्रदर्शन गर्ने भिडियोहरूलाई बेलायती सेना प्रमुख वाकरले चासोपूर्वक हेरेका थिए।

बेलायती सेना प्रमुख जनरल सर रोली वाकरले नेपाली सेना र ब्रिटिस सेनाबीचको लामो सम्बन्धबारे खुसी व्यक्त गरेका थिए। नेपाली सेनाले देखाएको अटल समर्पण, वफादारी र व्यावसायिकताको प्रशंसा गर्दै भविष्यमा थप सहकार्य र सहयोगलाई निरन्तरता दिने पनि प्रतिबद्धता उनले व्यक्त गरे।

बेलायतका लागि नेपालका राजदूत चन्द्रकुमार घिमिरेले नेपाली सेनाको गौरवशाली इतिहास र स्थायी विरासतको बारेमा चर्चा गरेका थिए। घिमिरेले बेलायती सेनामा सेवा गर्ने गोर्खाहरूको योगदानको पनि चर्चा गरेका थिए।

गोर्खाहरूले दुई शताब्दीभन्दा बढी समयदेखि हाम्रा दुई देशहरूबीच बलियो सम्बन्ध कायम राख्दै आएका छन्। लन्डन दूतावासका सैनिक सहचारी कर्णेल अनुप शाहले इतिहासका महत्त्वपूर्ण क्षणहरूमा नेपाली सेनाले गरेका अमूल्य बलिदानहरूलाई स्मरण गर्दै इतिहासका निर्णायक क्षणहरूमा नेपाली सेनाको अटल बलिदानप्रति श्रद्धाञ्जली अर्पण गरे।

बेलायतका लागि नेपाली राजदूत चन्द्रकुमार घिमिरे, लन्डनस्थित मित्र राष्ट्रका सैनिक सहचारीहरू, सरकारी अधिकारीहरू, सैनिक अधिकृतहरू, सञ्चारकर्मी र बेलायतस्थित नेपाली संघसंस्थाका प्रतिनिधि लगायत करिब डेढसय अतिथिहरूको कार्यक्रममा सहभागिता थियो।

यता महाशिवरात्रि (फागुन १४) गते नेपालमा सम्पन्न भएको सेना दिवसको मूल समारोहमा भारतीय सेनाका ६ भूतपूर्व स्थलसेनाध्यक्षहरू सहभागी भएका थिए।

भारतीय पूर्वस्थल सेनाध्यक्षहरू जोगिन्दर जसवन्त सिंह, दीपक कपुर, डाक्टर विजय कुमार सिंह, दलवीर सिंह सुहाग, डा. मनोज मुकुन्द नरवणे, र मनोज पाण्डे नेपाली सेना दिवसको मूल कार्यक्रममा सहभागी भएका हुन्।

सैनिक जनसम्पर्क तथा सूचना निर्देशनालयका अनुसार उनीहरू नेपाली सेनाका मानार्थ महारथीबाट सम्मानित भएका व्यक्तित्व हुन्।