सातामै दोस्रो पटक सगरमाथाको चुचुरोमा पुगे कामीरिता, २८ आरोहणको रेकर्ड

काठमाडौँ- कीर्तिमानी आरोही कामीरिता शेर्पाले २८औँ पटक सगरमाथाको सफल आरोहण गरेका छन्। आफ्नै रेकर्ड तोडेर बनाएको नयाँ रेकर्डको बराबरी सोलुखुम्बु पाङ्बोचेका पासाङ दावा शेर्पाले गरेपछि कामीरिता पुनः सगरमाथाको आरोहणमा निस्किएका थिए।

दावाले सोमबार मात्र २७औँ पटक सगरमाथा आरोहण गरेका थिए। यसअघि जेठ ३ गते मात्र कामीरिताले २७औं पटक सगरमाथाको चुचुरोमा पुगेका थिए।  तर त्यसको एक दिन लगत्तै कामीले २८औँ पटक सगरमाथाको सफल आरोहण गरेका हुन्। कामीरिताले एक सातामा नै दोस्रो पटक सगरमाथाको आरोहण गरेका हुन्।

सेभेन समिट ट्रेक्सका म्यानेजर थानेश्वर गुरागाईंका अनुसार मंगलबार बिहान ९ बजेर २३ मिनेट जाँदा २८औं पटक सगरमाथाको चुचुरोमा पुगेका हुन्। यही सिजनमा कामीरिताले दोस्रो पटक सगरमाथा आरोहण गरेका छन्।

सोलुखुम्बुको थामे गाउँमा जन्मिएका शेर्पा पहिलो पटक १३ मे १९९४ मा सगरमाथा चुचुरोमा पुगेका थिए। सन् २०१८ देखि कामीरिताले आफैँले बनाएका रेकर्ड तोड्दै आएका छन्।

खुम्बु पासाङल्हामु गाउपालिकाको थामेका ५३ वर्षीय शेर्पाले सबैभन्दा धेरै पटक सगरमाथा आरोहण गरेका छन् भने ८ पटक चोयु, ३ पटक मनास्लु, ल्होत्स र केटु एकएक पटक गरी ८ हजार मिटरभन्दा अग्ला हिमाल ४० पटक आरोहण गरेका हुन्।

शेर्पाले यसअघि तीन सिजनमा दुई–दुई पटक सगरमाथा आरोहण गरेका थिए। शेर्पाले चुचुरोसम्म डोरी टाँग्ने जिम्मेवारी पनि पाएकाले सन् २००९, २०१० र २०१३ मा एकै याममा दुई पटक सगरमाथा चढेका थिए।

कृषि तथा वन विश्वविद्यालयको झण्डा सगरमाथामा
कृषि तथा वन विश्वविद्यालय रामपुरको झण्डा सर्वोच्च शिखर सगरमाथामा फहराइएको छ। गाइड नरेन ठकुरी, सहायक गाइड चेतन भोटेले सगरमाथाको चुचुरोमा पुगेर भरतपुर महानगरपालिकासँगै विश्वविद्यालयको झण्डा पनि फहराएका हुन्।

वैशाख २५ गते आधार शिविरबाट हिँडेको टोली जेठ ३ गते बिहान ८:३३ बजे सगरमाथाको चुचुरोमा पुगेको थियो। उक्त टोली अहिले काठमाडौं फिर्ता भएको छ।

विश्वको सबैभन्दा उच्च स्थानसम्म कृषि तथा वन विश्वविद्यालय पुगेको छ भन्ने सन्देश प्रवाह गर्न सगरमाथा शिखरमा झन्डा लगिएको विश्वविद्यालयका उपकुलपति पुण्यप्रसाद रेग्मीले बताए। कृषिसँग सम्बन्धित सबै विषय हिमालसँग सम्बन्धित छन् भन्ने सन्देश प्रवाह गर्न पनि झन्डा फहराइएको रेग्मीकाे भनाइ छ।