ओलीलाई प्रश्न सोध्ने पत्रकारको पास निलम्बन

काठमाडौँ- संघीय संसद सचिवालयले दुई पत्रकारको पास एक महिनाका लागि निलम्बन गरेको छ। सचिवालयको महासचिवस्तरीय निर्णयबाट ‘सुनौलो नेपाल’ युट्युब च्यानलका पत्रकार प्रकाश ओली र ‘युवा मन नेपाल’ च्यानलका किशोरकुमार श्रेष्ठको पास एक महिनाका लागि निलम्बन गरिएको हो।

पत्रकारद्वय ओली र श्रेष्ठले गत फागुन ४ गते प्रधानमन्त्री केपी ओलीलाई संघीय संसद भवन परिसरमा ‘तपाइँ हिटलर हो ?’, ‘तपाइँ तानाशाह हो?’ भनेर प्रश्न सोधेका थिए। ओली र श्रेष्ठले संसद भवन परिसरभित्र देखाएको व्यवहार र शैलीले संसदीय मर्यादा र अनुशासनको उल्लघंन भएको देखिएको सचिवालयको भनाइ छ।

उनीहरूको प्रश्नप्रति आपत्ति जनाउँदै संसदमा सत्तारूढ नेकपा (एमाले) का सांसद सूर्य थापाले फागुन ५ गतेको बैठकमा पत्रकारहरूले प्रधानमन्त्रीलाई प्रश्न सोध्दा प्रयोग गरेका शब्दबारे संसदको ध्यानाकर्षण गराएका थिए। ‘प्रधानमन्त्री प्रश्नोत्तरबाट बाहिरिँदा तपाईं हिटलर हो भनेर प्रश्न गरियो। संसदले बनाएको प्रधानमन्त्री हिटलर हुन्छ?,’ थापाले संसदमा बोल्दै भनेका थिए।

श्रेष्ठ मोरङ उर्लाबारी वडा नम्बर ६ का श्रेष्ठ २०७९ सालको स्थानीय तहको निर्वाचनमा एमालेबाटै वडा सदस्यको उम्मेदवार थिए। यता, प्रकाश ओली पनि एमालेसम्बद्ध विद्यार्थी संगठन अनेरास्ववियुको लुम्बिनी प्रदेश कमिटी सदस्य हुन्।