ट्रक चालकले किन बोके २५ करोड? सुन तस्करीमा यस्तो छ उनको साइनो

काठमाडौँ-  काठमाडौँ उपत्यका अपराध अनुसन्धान कार्यालयको प्रहरी टोलीले राजधानीबाट करिब रु २५ करोड २२ लाख ४५ हजार बराबरको विदेशी मुद्रा बरामद गरेको छ। राष्ट्र बैङ्कले आजका लागि निर्धारण गरेको विदेशी मुद्रा विनिमय दरअनुसार उक्त मूल्य बराबरको विदेशी मुद्रा बरामद गरेको हो।

ठूलो परिमाणमा अमेरिकी डलरसहितका विदेशी मुद्रा राजस्व छली गरी ओसारपसार तथा कारोबार गरेको सूचनाका आधारमा कार्यालयबाट खटिइएको टोलीले सोमबार बेलुका टोखा नगरपालिकास्थित झोरबाट उक्त रकम बरामद गरेको हो।

ना ७ ख १६५१ नंको मालवाहक ट्रकको चालक बस्ने ठाउँमा ‘फल्सबटम’ बनाई लुकाईछिपाई ल्याएको अवस्थामा सवारी चालक सिन्धुपाल्चोकको भोटेकोशी गाउँपालिकाका ४३ वर्षीय कुसाङ लामासहित पक्राउ गरिएको प्रहरी उपरीक्षक काजीकुमार आचार्यले जानकारी दिए।

बरामद गरिएको विदेशी मुद्रामा अमेरिकी डलर एक सय दरका तीन हजार ११९ थान, अमेरिकी डलर ५० दरका १७९, युरो ५०० दरका ११ थान, युरो २०० दरका ४८०, युरो १०० दरका चार हजार १४८ थान, युरो ५० दरका १७ हजार १७७ थान रहेको कार्यालयले आज आयोजित पत्रकार सम्मेलनमा जानकारी दिएको हो।

बरामद गरिएका विदेशी मुद्रासहित निजलाई विदेशी विनिमय (नियमित गर्ने) ऐन, २०१९ बमोजिमको कसुरमा थप अनुसन्धान र कारबाहीका लागि राजस्व अनुसन्धान विभागको जिम्मा लगाइएको छ।

उक्त ट्रक सिन्धुपाल्चोकको भोटेकोसी गाउँपालिका-१, का ४३ वर्षीय कुसाङ लामाले चलाएका थिए।

उनी ७ किलो सुन तस्करी प्रकरण्मा भरियाको अभियोगमा ५ वर्ष जेल बसेर जेलबाट छुटेको पाइएको प्रहरीले जनाएको छ। उनलाई रसुवाबाट गल्छी हुँदै काठमाडौं आइरहेको बा ८ च ७४२० नम्बरको हाइलक्स गाडीबाट ७ किलो सुनसहित प्रहरीले पक्राउ गरेको थियो।

उक्त विदेशी मुद्रा सुन ल्याउन लैजान लागेको हुन सक्ने प्रहरीको आशङ्का छ। हिरासतमा लिएर थप अनुसन्धान गरेपछि विस्तृत खुल्ने प्रहरीले जनाएको छ।

अहिले नै कुन प्रयोजनका लागि उक्त रकम लैजान लागिएको भन्न नसकिने प्रहरीले बताएको छ। विशेष सुराकीको आधारमा ट्रकलाई नियन्त्रणमा लिइएको प्रहरीले जनाएको छ।

पत्रकार सम्मलेनमा एक प्रहरी अधिकृतले भने, ‘विशेष सुराकीको आधारमा अवैध मुद्रा बोकेको एउटा गाडीमा झोरको बाटो हुँदै रसुवातिर गइरहेको कुरा गयो। केही स्थानमा अपरेशन सञ्चालन गरियो। पैसा लुकाउन सक्ने क्षेत्रको विश्लेषण गरी हाम्रो टिम त्यसतर्फ गयो। गाडीलाई रोकेर ड्राइभरसँग सोधपुछ गर्दा शङ्का लागेपछि नियन्त्रणमा लिएका हौँ।’ प्रहरीले उक्त ट्रक रसुवाबाट सीमापार गर्ने योजनामा रहेको हुन सक्ने आशंका गरेको छ।

काठमाडौं ल्याएर ट्रक चेक गरेकोसमेत प्रहरीले जनाएको छ।