प्रधानमन्त्री र टर्कीका राष्ट्रपतिबीच कुराकानी, विपीनको रिहाइमा सहयोग गर्न आग्रह

काठमाडौँ- प्रधानमन्त्री केपी शर्मा ओली र गणतन्त्र टर्कीका राष्ट्रपति रेकेप तय्यिप इर्डाेगनसँग टेलिफोन संवाद भएको छ। प्रधानमन्त्री निवास, बालुवाटारबाट प्रधानमन्त्री ओलीले टर्कीका राष्ट्रपति इर्डोगनसँग फोन संवाद गरेका हुन्।

संवादमा प्रधानमन्त्री ओलीले नेपाली विद्यार्थी विपीन जोशीको रिहाइका लागि पहल गरिदिन राष्ट्रपति इर्डोगनसँग आग्रह गरेको प्रधानमन्त्री ओलीको सचिवालयले जानकारी दिएको छ। इजरायलको गाजानजिकैको क्षेत्रबाट सन् २०२३ अक्टोबर ७ मा प्यालेस्टाइनी सशस्त्र समूह हमासले जोशीलाई नियन्त्रणमा लिएर हालसम्म बन्धक बनाएको छ।

जवाफमा राष्ट्रपति इर्डोगनले जोशीको रिहाइको विषयलाई आफूले गम्भीर चासोका रुपमा लिएको र उनको रिहाइका लागि पहल गर्ने बताएको ओली सचिवालयको भनाइ छ।

‘प्रधानमन्त्रीज्यको आग्रहपछि टर्किस राष्ट्रपति इर्डोगनले आफू र आफ्नो देशले नेपाली विद्यार्थी जोशीको रिहाइका लागि पहल गर्ने जानकारी उनको परिवार र नेपाली समाजलाई दिन आग्रह गर्नुभएको छ,’ ओली सचिवालयको भनाइ छ।

प्रधानमन्त्री ओलीले जोशीको रिहाइका लागि पहल गरिदिन यसअघि फागुन २७ गते इजिप्टका राष्ट्रपति अब्दुल फतेह एलसीसीसँग टेलिफोन कुराकानी गरेका थिए।

कुराकानीकै क्रममा आगामी अप्रिलमा टर्कीमा हुने कूटनीतिसम्बन्धी सम्मेलनका सहभागी हुन प्रधानमन्त्री ओलीलाई गरिएको निमन्त्रणाबारे राष्ट्रपति रेकेपले स्मरण गराएका थिए।

संवादका क्रममा आर्थिक एवं विज्ञान तथा प्रविधिका क्षेत्रमा सहकार्यका साथै दुई देशबीचको परस्पर सम्बन्ध विस्तारबारे कुराकानी भएको प्रधानमन्त्री ओलीको सचिवालयले जानकारी दिएको छ।