पाँचबुँदे सहमतिपछि बिनु यादवले तोडिन् अनशन

काठमाडौं– बलात्कारी श्रीमान् र ससुरालाई कानुनी दायरामा ल्याउनुपर्ने मागसहित उपवासमा रहेकी बिनु यादवले सरकारसँग पाँचबुँदे सहमति भएपछि अनशन तोडेकी छन्। उपप्रधान तथा गृहमन्त्री नारायणकाजी श्रेष्ठले ५ दिनदेखि अनशनरत बिनुलाई माइतीघर मण्डलामा जुस खुवाएर अनशन तोडाएका हुन्।

बिनुका मागमध्ये उनीमाथि पवन कठायतले जबर्जस्ती करणी उद्योग गरेको मुद्दाको निवेदनउपर कारबाहीका लागि गृह मन्त्रालयले महान्यायाधिवक्ताको कार्यालय लेखिपठाउने सहमति भएको छ।

गृहमन्त्री श्रेष्ठले सरकारले यादवको माग सम्बोधनका लागि सम्पूर्ण प्रयत्न गर्ने आश्वासन दिएका छन् । उनले भने, ‘जहाँ अन्याय र पीडा छ, त्यसलाई सम्बोधन गर्नुपर्छ भनेर हामी लागिरहेका छौं। तपाईंलाई सम्पूर्ण प्रयत्नका साथ न्याय दिन्छौं।’

यादवले सहमतिअनुसार आफ्नो माग पूरा गर्न उपप्रधानमन्त्री एवं गृहमन्त्री श्रेष्ठसँग आग्रह गरेकी छन्। ‘सरकारसँग भएको सहमतिअनुसार माग पूरा नभए आत्मदाहको बाटो रोज्न सक्छु’, उनले भनिन्।

अदातलमा विचाराधीन रहेका विषय अदालतबाट न्यायिक निरुपरण हुने, अन्य मागका सम्बन्धमा क्षेत्राधिकार रहेको सम्बन्धित निकायमा लेखिपठाउने, यादवको स्वास्थ्योपचार गर्ने र उनको जीविकोपार्जनका लागि आवश्यक सहयोग गर्न महिला, बालबालिका तथा ज्येष्ठ नागरिक मन्त्रालयमा लेखी पठाउने सहमति भएको छ।

बिनु १५ दिनदेखि कालीमाटी प्रहरीलाई २०७५ मा आफूमाथि जबर्जस्ती करणीको उजुरी फिर्ता गर्न लगाउने तत्कालीन प्रहरी नायब उपरीक्षक (डिएसपी) सुरज कार्कीमाथि कारबाही र अन्य विभिन्न पाँचबुँदे मागसहित माइतीघर मण्डलामा आमरण अनशनमा बसेकी थिइन्। उनले न्यायाधीश बद्रीप्रसाद ओली र यादवको काका ससुरा पवन कठायतलाई कारबाहीको माग गरेकी छन्।