चितवन दुर्घटनाबारे प्रहरीले निकाल्यो यस्तो निष्कर्ष

काठमाडौँ- गत शनिबार हेटौँडाबाट नारायणगढ जाँदै गरेको इभी भ्यान बससँग ठक्कर खाँएर भएको दुर्घटनामा ७ जनाको मृत्यु र २४ जना घाइते भएका थिए। चितवनको राप्ती नगरपालिका–३ स्थित पूर्व-पश्चिम राजमार्गमा भएको दुर्घटनाको मुख्य कारण भ्यान चालकको लापरवाही देखिएको प्रहरी अनुसन्धानको निष्कर्ष छ।

हेटौँडाबाट नाराणगढ जाँदै गरेको ०३–००१ ज २९९ नम्बरको ईभी भ्यान र धनगढीबाट काकडभिट्टा जाँदै गरेको प्रदेश १–०१–००१ ख ३५८३ नम्बरको बस ठक्कर खाँदा दुर्घटना परेको थियो।

जिल्ला ट्राफिक प्रहरी कार्यालय चितवनका प्रमुख गायत्रीराज शर्माका अनुसार इभीले ओभरटेक गर्ने क्रममा बससँग जुध्न पुगेको थियो। ‘अगाडी एउटा ट्रक आफ्नै स्पिडमा कुदिररहेको रहेछ। ट्रकलाई ओभरटेक गर्न इभीका चालकले स्पिड बढाए। त्यही वेला विपरीत दिशाबाट आएको बससँग ईभी ठोकिन पुगेको देखिन्छ,’ शर्माले भने।

यो दुर्घटनामा एकै परिवारका गर्भवती महिलासहित तीन जनाको मृत्यु भएको थियो। दुर्घटनामा हेटौँडा उपमहानगरपालिका-५ कि ५३ वर्षीया मैंयाकुमारी न्यौपाने पहाडी, उनका ३५ वर्षीय छोरा सरोज पहाडी र गर्भवती बुहारी २७ वर्षीया रेनुका कँडेलको मृत्यु भएको थियो।

यस्तै, हेटौंडा–४ का ५५ वर्षीय सोमप्रसाद रूपाखेती, रौतहटको चन्द्रनिगाहपुर–६ की ३१ वर्षीया सिता कुमारी, भ्यान चालक हेटौँडा-१० का राजु थिङ र लमजुङको बेसीसहर–३ घर भई भरतपुर–६ चोकबजार बस्ने पूर्णकुमारी खड्काको पनि मृत्यु भएको प्रहरीले जानकारी दिएको छ। घाइतेहरूको चितवनमा उपचार भइरहेको छ।