नेपाल हुँदै तीन आतंकवादी भारत छिरेपछि बिहारमा ‘हाइ अलर्ट’

नेपालको बाटो हुँदै जैश–ए– मोहम्मद समूहका तीन जना आतंकवादी भारतको बिहारमा प्रवेश गरेको भन्दै सुरक्षा व्यवस्था कडा पारिएको छ ।

भारतीय मिडियाहरुका अनुसार आतंकवादी घुसेको भन्दै भारतको प्रहरी मुख्यालयले सुरक्षाकर्मीलाई ‘हाई अलर्ट’मा राखेको छ। र, बिहारका विभिन्न स्थानमा भारती गुप्तचर निकायलाई पनि परिचालन गरिएको छ।

भारतीय मिडियाले आतंकवादी समूहका तीन सदस्यको नामै उल्लेख गरेका छन्। ‘ए मोहम्मदका हसनैन अली, आदिल हुसैन र मोहम्मद उस्मान नेपालको बाटो हुँदै भारतमा घुसे’ इन्डिया टुडेको समाचारमा भनिएको छ, ‘उनीहरु षडयन्त्रसहित भारत प्रवेश गरेपछि भारतीय सुरक्षा निकाय परिचालित भएको छ।’

समाचारमा लेखिए अनुसार उनीहरू तीनै जना पाकिस्तानी नागरिक हुन्। उनीहरू भारतमा घुसेको सूचनाले सुरक्षा निकायमा हलचल पैदा भएको समाचारमा उल्लेख छ। तर उनीहरू नेपाल–भारत सीमाको कुन नाका भएर बिहार प्रवेश गरे र कहिले प्रवेश गरे भन्ने समाचारमा उल्लेख छैन।

उनीहरूको हुलिया र परिचयसहितको विवरण प्रहरीका सबै युनिटहरूमा पठाइएको छ र सतर्क रहन भनिएको छ ।