४५.३६ अंकले घट्यो नेप्से, बढ्यो कारोबार

काठमाडौँ: दशैँपछि मंगलबारदेखि खुलेको शेयर बजार बुधबार पनि घटेको छ। मंगलबार ५८.५५ अंकले घटेको बजार आज ४५.३६ अंकले घटेर दुई हजार ५५९ अंकमा खुम्चिएको छ। दशैँपछि खुलेको बजार दुई कारोबार दिनमा १०३.९१ अंकले घटेको छ।

जेनजी आन्दोलनपछि ‌असर देखिएको शेयर बजार दशैँअघिका कारोबारमा पनि बढ्न सकेको थिएन, अधिकांश कारोबार दिनमा घटेको थियो।

नेप्से परिसूचक घटे पनि यसदिन कारोबार रकम भने बढेको छ। बुधबार ५ अर्ब ७६ करोड २७ लाख रूपैयाँको १ करोड ३७ लाख ४९ हजार ५०४ कित्ता शेयर  खरिदबिक्री भएको छ। मंगलबार ४ अर्ब ६२ करोड ९० लाख ४२ हजार रूपैयाँको १ करोड ३ लाख ४५ हजार ९०३ कित्ता शेयर कारोबार भएको थियो।

आज १३ वटै उपसमूहको शेयरमूल्य घटेको छ।

सबैभन्दा बढी फाइनान्स र होटल उपसमूहको शेयर ३/३ प्रतिशतले घटेको छ भने बैंकिङ १.४८, विकास बैंक २.२८, हाइड्रोपावर २.३४, लगानी २.०२, जीवन बीमा १.६४, उत्पादन तथा प्रशोधन १.०६, माइक्रोफाइनान्स १.८९, निर्जीवन बीमा २.०६, अन्य १.२४ र व्यापार समूह ०.४३ प्रतिशतले घटेको छ।