नेप्सेमा उच्च अंकको वृद्धि, कारोबार पनि २ अर्ब ३१ करोड रुपैयाँले बढ्यो

काठमाडौँ: साताको पहिलो कारोबार दिन शेयर बजारमा उच्च अंकको वृद्धि भएको छ। आइतबार नेप्से परिसूचक ४७.५५ अंकले बढेर दुई हजार ६३३.४२ विन्दुमा बजार बन्द भएको छ।

आज सेन्सेटिभ इन्डेक्स ८.२५ अंक, फ्लोट इन्डेक्स ३.४० अंक र सेन्सेटिभ फ्लोट इन्डेक्स २.८७ अंकले बढेको छ।

यसदिन १३ वटै समूहगत परिसूचकमध्ये सबै समूहको परिसूचक बढेको छ। जसमध्ये सर्वाधिक वित्त उपसमूह २.७० प्रतिशतले बढेको छ भने विकास बैंक र अन्य उपसमूहको परिसूचकको वृद्धि २ प्रतिशतभन्दा ज्यादा छ। त्यसबाहेक अन्य उपसमूहको वृद्धि भने १ प्रतिशतभन्दा कम छ।

यसदिन मिड सोलु हाइड्रोपावरको शेयरमूल्य सर्वाधिक ९.४९ प्रतिशत बढेकोमा जोशी हाइड्रोपावर डेभलपमेन्ट कम्पनीको शेयरमूल्य ६.९७, उपर स्याङ्गे हाइड्रोपावरको शेयरमूल्य ६.५२, रुरु जलविद्युत परियोजनाको शेयरमूल्य ५.१६ र मल्टिपर्पोज फाइनान्सको शेयरमूल्य ४.८९ ले बढेको छ। यसैगरी विन लघुवित्तका लगानीकर्ताले सर्वाधिक १० प्रतिशत गुमाएका छ्न्।

आइतबार कारोबार रकममा पनि वृद्धि भएको छ। यसदिन २ अर्ब ३१ करोड रुपैयाँले कारोबार बढेर पाँच अर्ब ५३ करोड रुपैयाँको एक करोड ३४ लाख ६८ हजार १४५ कित्ता शेयर किनबेच भएको छ।