२८.७३ अंकले बढ्यो नेप्से, करिब साढे ६ करोडको कारोबार

काठमाडौँ: साताको दोस्रो कारोबार दिन शेयर बजारमा हरियाली देखिएको छ। आइतबार १०.२९ अंकले घटेर २ हजार ६१० विन्दुमा झरेको नेप्से परिसूचक यसदिन २८.७३ अंकले बढेको छ। सोमबार दुई हजार ६३९.३७ अंकमा बजार बन्द भएको छ।

सोमबार कारोबार रकम पनि बढेको छ। अघिल्लो कारोबार दिन ५ अर्बको १ करोड २ लाख कित्ता शेयर कारोबार भएकोमा यसदिन ६ करोड ४७ लाख ३७ हजार रुपैयाँको १ करोड २४ लाख ५९ हजार ९५१ कित्ता शेयर किनबेच भएको छ।

आज २१४ कम्पनीको शेयर मूल्य  बढेको छ भने ३७ कम्पनीको शेयरमूल्य ओरालिएको छ। बाँकी ८ कम्पनीको शेयरमूल्यमा कुनै थपघट भएको छैन।

यसैगरी आज ५ वटा कम्पनीको मूल्यमा सकारात्मक सर्किट लागेको छ। सागर डिस्टिलरी, एसवाई प्यानल, श्रीनगर एग्रिगेट इन्डस्ट्री, बन्दीपुर केवलकार र रुरु जलविद्युतका शेयरधनीले सर्वाधिक १० प्रतिशत कमाएका छन्। यस्तै बाराही हाइड्रोपावरको शेयर ९.९८ र दरमखोला हाइड्रोपावरको शेयर ९.५४ प्रतिशतले वृद्धि भएको छ।

आज शेयरमूल्य घटेका कम्पनीले पनि खासै गुमाएका छैनन्। सोमबार १०.३० प्रतिशत स्टान्डर्ड चार्टर्ड बैंक लिमिटेड डिबेन्चर र सप्तकोशी डेभलपमेन्ट बैंकका लगानीकर्ताले सर्वाधिक २.४९ प्रतिशत गुमाएका छन्। यस्तै रिलायबल नेपालको शेयरमूल्य २.२३ र ८.५ प्रतिशत माछापुच्छ्रे बैंक लिमिटेड २०८७ डिबेन्चरका लगानीकर्ताको शेयरमूल्य २  प्रतिशतले ओरालिएको छ।

सोमबार शिवम् सिमेन्टको शेयर सर्वाधिक कारोबार भएको छ। यसदिन शिवम् सिमेन्टको ३८ करोड ६९ लाख ५० हजार रुपैयाँ बराबरको शेयर खरिदबिक्री भएको छ। कारोबार पटकका हिसाबमा बन्दीपुर केवलकारको शेयर सर्वाधिक चार हजार ४४१ पटक खरिदबिक्री भएको छ।