थपियो ४९५ मेगावाट बिजुली, ९९ प्रतिशत जनतामा पुग्यो उज्यालो

काठमाडौँ: चालू आर्थिक वर्षको दोस्रो त्रैमाससम्म आइपुग्दा विद्युत जडित क्षमता बढेर चार हजार ८६ मेगावाट पुगेको छ। अधिकांश निजी क्षेत्र र नेपाल विद्युत प्राधिकरणका सहायक कम्पनीमार्फत सम्पन्न जलविद्युत र सोलार आयोजनाहरु गरी चार हजार मेगावाट बढी जडित क्षमता पुगेको हो।

चालू आर्थिक वर्षको छ महिनामा मात्रै ४९५ मेगावाट बिजुली थप भएको छ। निर्माणाधीन विभिन्न परियोजना सम्पन्न भई उक्त परिमाण बिजुली थप भएको हो। छ महिनामा विद्युत प्राधिकरणले सहायक कम्पनीबाट निर्माण थालेको १०२ मेगावाटको मध्यभोटेकोसी जलविद्युत आयोजना सम्पन्न भएको छ।

बिजुली उत्पादन वृद्धिसँगै प्रतिव्यक्ति खपत पनि बढेर ४५० युनिट पुगेको छ। हालसम्म राष्ट्रिय विद्युत प्रणाली र वैकल्पिक ऊर्जाको स्रोतबाट विद्युतमा पहुँच प्राप्त जनसंख्या ९९ प्रतिशत पुगेको छ। यस अवधिसम्म ६६ केभी भन्दा माथिका सात हजार २४७ सर्किट किलोमिटर प्रसारण लाइन तथा १४ हजार १२३ एमभीए क्षमताको सबस्टेशन निर्माण भएका छन्। यसबीचमा विद्युत चुहावट १२.७३ प्रतिशत रहेको छ।

सरकारले चालू आर्थिक वर्ष सरकारले नौ सय मेगावाट बिजुली थप गरी जडित क्षमता ४५ सय मेगावाट पुर्‍याउने लक्ष्य लिएको छ।

गत वर्ष भारत र बंगलादेशमा १९ अर्ब बराबरको बिजुली निर्यात भएको छ। यस्तै बंगलादेशले नेपालबाट थप २० मेगावाट बिजुली आयात गर्ने सहमति भएको छ।

यो समेत गरी बंगलादेशमा ६० मेगावाट बिजुली निर्यात हुने भएको छ। यो वर्ष बिजुली निर्यात बढेको छ। यसैगरी नेपाल–भारत संयुक्त प्राविधिक टोलीको १७ औँ बैठकबाट नेपालबाट १५ सय मेगावाट निर्यात र भारतबाट एक हजार ४०० मेगावाट आयात क्षमता कायम गरिएको छ।

सरकारले आगामी एक दशकमा १५ हजार मेगावाट बिजुली निर्यात गर्ने लक्ष्य लिएको छ। जसअनुसार १० हजार मेगावाट भारत र पाँच हजार मेगावाट बंगलादेशमा निर्यात गर्ने लक्ष्य लिएको छ।