दाउन्नेको सास्ती अन्त्यतिर, नारायणघाट–बुटवल सडक विस्तार ९१ प्रतिशत सम्पन्न

काठमाडौँ: वर्षौँदेखि यात्रुका लागि हैरानीको विषय बनेको नारायणघाट–बुटवल सडकखण्ड विस्तार आयोजना निर्माणको कार्य अन्तिम चरणमा पुगेको छ। पूर्व–पश्चिम राजमार्गअन्तर्गत पर्ने यस सडकको निर्माण प्रगति ९१ प्रतिशत नाघिसकेको भन्दै सडक विभागले बाँकी काम छिट्टै टुंगिने दाबी गरेको छ।

सडक विभागका महानिर्देशक डा. विजय जैसीका अनुसार आयोजनाका प्रमुख संरचनागत कामहरू लगभग सम्पन्न भइसकेका छन्। अहिले सडकलाई पूर्ण सञ्चालनयोग्य बनाउन आवश्यक फिनिसिङ, ट्राफिक सुरक्षासम्बन्धी पूर्वाधार, सेवा मार्ग तथा केही सहायक संरचनाको काम मात्रै बाँकी छ।

उनकाअनुसार जेठ १५ भित्र सडक निर्माण सम्पन्न गरिसक्ने र त्यसपछि यात्रा सहज हुनेछ।

पूर्वाधार विकासमन्त्री सुनिल लम्साल नेतृत्वको टोलीले शनिबार नागढुंगा–नौबिसे र नारायणघाट–बुटवल सडकखण्डको स्थलगत निरीक्षण गरेपछि विभागले निर्माण प्रगतिको पछिल्लो अवस्था सार्वजनिक गरेको हो।

विशेषगरी दाउन्ने क्षेत्र ७ वर्षदेखि यात्रुका लागि बर्खायामको सबैभन्दा चुनौतीपूर्ण खण्ड बनेको थियो। सडक विभागका अनुसार अहिले त्यहाँ एकतर्फी दुई लेनमा पुनः कालोपत्रेको काम सम्पन्न भइसकेको छ भने थप एक लेन निर्माण तीव्र रूपमा अघि बढाइएको छ। विभागले जेठ १५ भित्र मुख्य निर्माण कार्य टुंग्याउने लक्ष्य राखेको जनाएको छ।

महानिर्देशक जैसीले यस वर्ष अघिल्ला वर्षजस्तो दाउन्ने क्षेत्रमा लामो जाम र सडक अवरोधको समस्या दोहोरिने सम्भावना न्यून भएको दाबी गरे। निर्माणका अधिकांश जटिल काम सम्पन्न भइसकेकाले यात्रुले राहत महसुस गर्न सक्ने उनको भनाइ छ।

चिनियाँ ठेकेदार कम्पनी चाइना स्टेट इन्जिनियरिङ कर्पोरेसनले १७ अर्बमा उक्त सडक विस्तारको ठेक्का पाएको थियो। २०७५ चैतबाट काम सुरु भए पनि समयमै सम्पन्न हुनसकेको थिएन। पछिल्लो समय २०८३ साउन ५ गतेसम्मका लागि चौथोपटक म्याद थप भएको थियो।