ऋण नतिरेपछि भोटेकोसी हेली रिसोट लिलामीमा, नेपाल बैंकले १५ दिनभित्र बेच्ने

काठमाडौं। नेपाल बैंकले सिन्धुपाल्चोकको कोदारी राजमार्गमा रहेको भोटेकोसी हेली रिसोर्ट एन्ड स्पा लिमिटेडका सञ्चालकहरुले ऋण नतिरेपछि लिलामी प्रक्रिया अघि बढाएको छ।

बैंकले रिसोर्ट लिलामीका लागि १५ दिनको समय दिएको छ। असार २९ गतेसम्म प्रस्ताव आब्हान गरेको बैंकले जनाएको छ। बैंकले तेस्रो पटक सूचना प्रकाशित गरी रिसोर्टको सम्पत्ति बेचेर ऋण असूल गर्न लागेको हो।

यसअघि २०८२ जेठ २७ मा बैंकले पहिलो पटक रिसोर्टका सञ्चालकहरुलाई ऋण तिर्न ३५ दिन समय दिएको थियो। झण्डै एक वर्षपछि गत जेठ १ मा बैंकले सञ्चालकहरुलाई ऋण तिर्न ३५ दिन समय दिएको थियो।

३५ दिन कटेपछि लिलामी गर्ने भनेको थियो। जेठमा बैंकले कर्जा तिर्न ३५ दिनको अन्तिम ‘अल्टिमेटम’ दिएको थियो। बैंकले सूचना प्रकाशित गरी ३५ दिनभित्र ऋण नतिरे ३६ दिनमा लिलामी गर्ने जानकारी दिएको थियो।

३५ दिनभित्र ऋण चुक्त नगरे कर्जा सूचना केन्द्रको कालो सूचीमा राखी सम्पत्ति लिलामी गर्ने जानकारी बैंकले दिएको थियो। बैंकले आगामी असार ४ गतेसम्म ऋण नतिरे ५ गते लिलाम गरेर ऋण असूल गर्ने जानकारी दिएको थियो।

बैंकको ऋण नतिरेपछि लिलामीमा चढ्यो भोटेकोसी हेली रिसोर्ट

तर, लिलामी हुन नसकेपछि पुनः बेच्न लागेको हो। बैंकले विभिन्न चार कित्तामा रहेको झण्डै ३५ रोपनी जग्गा र सोमा बनेको घर र चर्चेको सबै लिगगापातसमेत लिलाम गर्ने जनाएको छ।पटक पटक ताकेता र समय दिँदा पनि ऋण नतिरेपछि सुरक्षणको रुपमा दिएको सम्पत्ति लिलाम गरेर ऋण असूल गर्ने जानकारी बैंकले दिएको छ।

बैंक तथा वित्तीय संस्था सम्बन्धी ऐन, २०७३ ले दिएको अधिकार प्रयोग गरी बैंक आफैँले लिलाम बिक्री गर्ने भएको छ। जग्गा खरिद गर्न चाहाने व्यक्ति वा संस्थाले सकार गर्न चाहेको मूल्यमा बोलकबोलमा भाग लिन बैंकले भनेको छ।

लिलाम बढाबढमा सबैभन्दा बढी रकम कबोल गर्ने व्यक्तिले कबोल गरेको रकमको १० प्रतिशत रकम नगदै घरौटी स्वरूप तत्कालै सोही दिन बैंकमा जम्मा गर्नुपर्नेछ।

रिसोर्टले बैंकबाट व्यापारिक आवाधिक र चालूपुँजी कर्जा लिएको थियो। बैंकले रिसोर्टको नाममा मालपोत कार्यालय सिन्धुपाल्चोकमा दर्ता कायम रहेको मार्मिङ १ स्थित कित्ता नम्बर १३६, ५७२, ५७०, १७८ को क्षेत्रफल क्रमशः ४ १ १ १ १९ १२ ३ ० ६ ० ० ० र ५ १ ३ २ रोपनीको जग्गा र घर तथा सोले चर्चेको सम्पूर्ण लिगलगापात लिलाम गर्ने बैंकले जनाएको छ।

रिसोर्टले लिएको ऋणको साँवा तथा त्यसको ब्याज नियमित भुक्तानी नगरेको बैंकले जनाएको छ। कर्जा असुलीका लागि पटक–पटक ताकेता, सम्पर्क र पत्राचार गर्दा पनि अनुरोधलाई बेवास्ता गरेको आरोप बैंकको छ।

रिसोर्टका अध्यक्ष चीनबहादुर रानाभाट हुन्। सञ्चालकमा छिरिङ शेर्पा, सुवास प्रधान र समिरकुमार नेपाल रहेका बैंकले जनाएको छ।

भोटेकोसी हेली रिसोर्ट २०७८ सालदेखि सञ्चालित छ। रिसोर्टको क्षमता चारतारेस्तरसम्म बनाउने तयारी थियो।

रिसोर्टको स्तरोन्नतिका साथै विभिन्न रणनीतिक योजना कार्यान्वयनका निम्ति रिसोर्टले नबिल इन्भेष्टमेन्ट बैंकिङ लिमिटेडसँग व्यावसायिक सम्झौता गरेको थियो। नबिलले भोटेकोसी हेलीको साधारण सेयर (आईपीओ) निष्कासनमा सहयोग गर्ने उल्लेख थियो।