७ प्रतिशत ब्याज दिने लक्ष्मी सनराइज बैंकको ऋणपत्र साउन १४ देखि खुल्ने

काठमाडौँः लक्ष्मी सनराइज बैंक लिमिटेडले ३ अर्ब रुपैयाँ बराबरको ऋणपत्र निष्कासन गर्ने भएको छ। बैंकले १० वर्ष अवधिको ‘७ प्रतिशत लक्ष्मी सनराइज डिबेञ्चर २०९२’ निष्कासन गर्न लागेको हो।

बैंकले प्रतिऋणपत्र १ हजार रुपैयाँ अंकित मूल्यका ३० लाख कित्ता ऋणपत्र निष्कासन गर्ने जनाएको छ। ऋणपत्रमा लगानी गर्नेले वार्षिक ७ प्रतिशत ब्याज पाउनेछन्।

कुल निष्कासनमध्ये ६० प्रतिशत अर्थात् १ अर्ब ८० करोड रुपैयाँ बराबरका १८ लाख कित्ता ऋणपत्र व्यक्तिगत तवरबाट बिक्री तथा बाँडफाँट गरिनेछ। बाँकी ४० प्रतिशत अर्थात् १ अर्ब २० करोड रुपैयाँ बराबरका १२ लाख कित्ता ऋणपत्र सर्वसाधारणका लागि छुट्याइएको छ।

सर्वसाधारणका लागि निष्कासन गरिने ऋणपत्रमध्ये ५ प्रतिशत अर्थात् ६० हजार कित्ता सामूहिक लगानी कोषका लागि सुरक्षित गरिएको बैंकले जनाएको छ।

ऋणपत्रमा लगानी गर्न इच्छुकले न्यूनतम २५ कित्तादेखि अधिकतम निष्कासन गरिएको सम्पूर्ण कित्ताका लागि आवेदन दिन सक्नेछन्। ऋणपत्रको निष्कासन तथा बिक्री खुला साउन १४ गतेदेखि हुनेछ। आवेदन दिने अवधि छिटोमा साउन १९ गतेसम्म र ढिलोमा साउन २८ गतेसम्म कायम रहनेछ।

ऋणपत्र निष्कासन तथा बिक्री प्रबन्धकको जिम्मेवारी माछापुच्छ्रे क्यापिटल लिमिटेडले पाएको छ।

लगानीकर्ताले नेपाल धितोपत्र बोर्डबाट स्वीकृति प्राप्त सी–आस्बा सेवामा सहभागी बैंक तथा वित्तीय संस्था र तिनका तोकिएका शाखा कार्यालयमार्फत आवेदन दिन सक्नेछन्। यस्तै, सिडिएस एन्ड क्लियरिङ लिमिटेडले सञ्चालनमा ल्याएको ‘मेरो सेयर’ अनलाइन प्रणालीमार्फत पनि सी–आस्बा प्रक्रियाबाट आवेदन दिन सकिनेछ।

बैंकले जारी गर्न लागेको उक्त ऋणपत्रले दीर्घकालीन लगानीका लागि स्थिर प्रतिफल खोज्ने लगानीकर्तालाई अवसर प्रदान गर्ने अपेक्षा गरिएको छ।