ग्लोबल आईएमई बैंकको नाफा २२.६२ प्रतिशतले बढ्यो, वितरणयोग्य नाफा कति?

काठमाडौँः ग्लोबल आईएमई बैंकले आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ। बैंकले वित्तिय विवरण सार्वजनिक गर्दै नाफा र प्रतिशेयर आम्दानी (ईपीएस) दुवैमा उल्लेख्य सुधार भएको जनाएको छ।

समीक्षा अवधिमा बैंकले ६ अर्ब २२ करोड ८१ लाख रुपैयाँ खुद नाफा आर्जन गरेको छ। यो अघिल्लो आर्थिक वर्ष २०८१/८२को सोही अवधिको ५ अर्ब ७ करोड ६३ लाख रुपैयाँको तुलनामा २२.६२ प्रतिशतले बढी हो।

नाफासँगै बैंकको प्रतिसेयर आम्दानी पनि सुधारिएको छ। अघिल्लो वर्ष १३ रुपैयाँ ३२ पैसा रहेको ईपीएस बढेर १६ रुपैयाँ ३४ पैसा पुगेको छ। त्यसैगरी, प्रतिसेयर नेटवर्थ १८३ रुपैयाँ १४ पैसा कायम भएको बैंकले जनाएको छ।

बैंकले गत आर्थिक वर्षमा १६ अर्ब २० करोड रुपैयाँ खुद ब्याज आम्दानी गरेको छ भने सम्भावित कर्जा नोक्सानी व्यवस्थापनका लागि ४ अर्ब ७८ करोड ८४ लाख रुपैयाँ प्रोभिजन छुट्याएको छ। सञ्चालन नाफा ८ अर्ब ६८ करोड रुपैयाँ पुगेको वित्तीय विवरणमा उल्लेख छ।

लाभांश वितरण क्षमताको आधार मानिने वितरणयोग्य नाफा ४ अर्ब ५८ करोड रुपैयाँ रहेको छ। साधारण सेयरधनीका आधारमा प्रतिसेयर वितरणयोग्य नाफा १२ रुपैयाँ २ पैसा कायम भएको छ।

पूँजी पर्याप्तताका सूचकहरू पनि नियामकीय सीमाभित्र रहेका छन्। समीक्षा अवधिमा बैंकको कुल पूँजी कोष अनुपात १२.१० प्रतिशत, प्राथमिक पूँजी अनुपात १०.०४ प्रतिशत, कोषको लागत ३.४३ प्रतिशत र आधार दर ४.७५ प्रतिशत रहेको छ।

व्यवसाय विस्तारतर्फ बैंकको निक्षेप संकलन ६ खर्ब ६९ अर्ब १७ करोड रुपैयाँ पुगेको छ भने कर्जा लगानी ४ खर्ब ३९ अर्ब ३४ करोड रुपैयाँ कायम भएको छ। बैंकको चुक्ता पूँजी ३८ अर्ब ११ करोड रुपैयाँ रहेको छ भने जगेडा कोष २७ अर्ब १० करोड रुपैयाँ पुगेको छ।