नाडा अटो एक्स्पोमा डोङफेंगका विद्युतीय बस सार्वजनिक हुँदै, मूल्य कति?

काठमाडौँ: हिमालयन अर्गनाइजेशनअन्तर्गतको आयाम इन्टरकन्टिनेन्टलले चीनको डोङफेंग मोटर कर्पोरेसनले उत्पादन गरेका विद्युतीय बस नेपाली बजारमा सार्वजनिक गर्ने भएको छ। भदौ २६ गतेदेखि काठमाडौंको भृकुटीमण्डपमा आयोजना हुने नाडा अटो एक्स्पोमा कम्पनीले डोङफेंगका दुई मोडलका बस सार्वजनिक गर्न लागेको हो।

एक्स्पोमा ७.२ मिटर लम्बाइका २६ देखि ३० सिट क्षमताका बस सार्वजनिक गरिने कम्पनीले जनाएको छ। निकट भविष्यमा ९ मिटरका ३८ सिट र १२ मिटरका ५२ सिट क्षमताका बससमेत नेपाली बजारमा ल्याउने तयारी रहेको कम्पनीको भनाइ छ।

कम्पनीका अनुसार सार्वजनिक गर्न लागिएका बसको मूल्य नेपालमा उपलब्ध अन्य ब्रान्डका समान क्षमताका बसको तुलनामा निकै कम हुनेछ। यद्यपि मूल्य तथा अन्य प्राविधिक विवरण एक्स्पोमै सार्वजनिक गरिने जनाइएको छ। एक्स्पोमा बुकिङ गर्ने ग्राहकका लागि विशेष छुटको योजना पनि ल्याइने कम्पनीले जनाएको छ।

नेपालमा ठूला विद्युतीय बसको माग बढ्दै गएको र सरकारले समेत विद्युतीय सार्वजनिक यातायातलाई प्राथमिकता दिन थालेकाले डोङफेंगका बस भित्र्याइएको आयाम इन्टरकन्टिनेन्टलले जनाएको छ।

डोङफेंग चीनको प्रमुख अटोमोबाइल उत्पादक कम्पनी हो। कम्पनीले यात्रुवाहक तथा व्यावसायिक सवारी, बस, ट्रक र विद्युतीय सवारी उत्पादन गर्दै आएको छ। डोङफेंगका ट्रक, कार तथा माइक्रोबस यसअघि नै नेपाली बजारमा बिक्री हुँदै आएका छन्।