घरायसी उपभोक्तालाई ग्यासमा प्राथमिकता, होटल–रेस्टुरेन्टले उपत्यकाबाहिरबाट ल्याउनुपर्ने

काठमाडौँः नेपाल आयल निगमले काठमाडौँ उपत्यकामा घरायसी उपभोक्ताका लागि एलपी ग्यासको आपूर्ति सहज बनाउन व्यावसायिक प्रयोजनका लागि ग्यास बिक्रीमा रोक लगाएको छ।

नयाँ व्यवस्थाअनुसार अब उपत्यकाभित्र रहेका ग्यास डिपो तथा विक्रेताले होटल, रेस्टुरेन्ट, उद्योगलगायत व्यावसायिक उपभोक्तालाई ग्यास बिक्री गर्न पाउने छैनन्। व्यावसायिक प्रयोजनका लागि आवश्यक ग्यास भने सम्बन्धित होटल, रेस्टुरेन्ट तथा उद्योगले उपत्यकाबाहिर रहेका ग्यास उद्योगबाट प्रत्यक्ष खरिद गरी आफैं ढुवानी गरेर ल्याउनुपर्नेछ।

नेपाल आयल निगमका ग्यास विभाग प्रमुख विनीतमणि उपाध्यायका अनुसार उपत्यकामा ग्यासको आपूर्तिमा घरायसी उपभोक्तालाई प्राथमिकता दिन यस्तो व्यवस्था लागू गरिएको हो।

उपत्यकामा घरायसी प्रयोजनका लागि ग्यासको माग उच्च रहेको र सोही आपूर्ति प्रणालीबाट व्यावसायिक क्षेत्रले समेत ठूलो परिमाणमा ग्यास खरिद गर्दा सर्वसाधारण उपभोक्ताले अभावको सामना गर्नुपर्ने अवस्थालाई ध्यानमा राख्दै व्यावसायिक बिक्रीमा रोक लगाइएको निगमको भनाइ छ।

निगमले होटल, रेस्टुरेन्ट तथा उद्योगमा ग्यासको प्रयोगमा प्रतिबन्ध लगाएको भने होइन। उनीहरूले आवश्यक ग्यास उपत्यकाबाहिरका ग्यास उद्योगबाट खरिद गर्न सक्नेछन्। तर, खरिद र ढुवानीको सम्पूर्ण व्यवस्थापन सम्बन्धित व्यवसायीले नै गर्नुपर्नेछ।

यससँगै हेटौंडा, चितवन, नवलपरासी लगायतका जिल्लाबाट काठमाडौं उपत्यकामा ल्याइएका ग्यास सिलिन्डर पनि उपत्यकाभित्र व्यावसायिक प्रयोजनका लागि बिक्री गर्न नपाइने भएको छ।

निगमको यो निर्णयसँगै ठूलो परिमाणमा ग्यास खपत गर्ने होटल, रेस्टुरेन्ट तथा उद्योगको ग्यास व्यवस्थापनको जिम्मेवारी सम्बन्धित व्यवसायमै सरेको छ। निगमले भने यस व्यवस्थाबाट घरायसी उपभोक्ताका लागि ग्यासको उपलब्धता सहज हुने र बजारमा हुन सक्ने अभाव कम हुने अपेक्षा गरेको छ।

अब व्यावसायिक प्रयोजनका लागि ग्यास आवश्यक पर्ने व्यवसायी तथा उद्योगले उपत्यकाबाहिरका ग्यास उद्योगसँग प्रत्यक्ष समन्वय गरी खरिद र ढुवानीको व्यवस्था गर्नुपर्नेछ।