बूढानीलकण्ठ फरेष्ट हिल्सले लक्जरी वेलनेस रिसोर्ट बनाउदै, लागत १ अर्ब ११ करोड

काठमाडौँ: पछिल्ला वर्ष राजधानीको बूढानीलकण्ठमा तारे होटलहरू खुल्ने क्रम बढेको छ। बूढानीलकण्ठ विस्तारै पर्यटकीय केन्द्र बन्दै गएको छ।

त्यहाँ लेमन ट्री, पार्क भिलेज, फरेष्ट इनजस्ता पाँचतारे स्तरका होटल खुलिसकेका छन्। त्यस क्षेत्रमा अन्य होटलहरू आउने क्रम बढिरहेको छ। बूढानीलकण्ठ धार्मिक पर्यटकीय क्षेत्रको रुपमा विकास हुँदै गएको छ।

यसैगरी बूढानीलकण्ठ फरेष्ट हिल्स प्रालिले ६३ कोठाको लक्जरी हस्पिटालिटी तथा वेलनेस रिसोर्ट निर्माण गर्ने भएको छ। जसमध्ये ३३ कोठाहरू परम्परागत विलासी आतिथ्य र ३० कोठाहरू शिक्षक–प्रशिक्षण, रिट्रिट, ध्वनि उपचार, आयुर्वेद, संगीत थेरापी र कर्पोरेट कार्यक्रमसहित वेलनेस र रिट्रिटमा आधारित हुने भएको छ।

होटल बनाउन १ अर्ब ११ करोड रुपैयाँ खर्च हुने अनुमान गरिएको छ। कुल लगानीमा स्वपुँजी र ऋण लगानी हिस्सा आधा हुने बूढानीलकण्ठ फरेष्ट हिल्सले जनाएको छ। ५५ करोड रुपैयाँ संस्थापकको स्वपुँजी (इक्विटी) र बाँकी ५५ करोड रुपैयाँ ऋण हुने गरि लगानी संरचना बनाइएको छ।

हाल ऋण लगानी सम्झौताको प्रक्रियामा रहेको भए पनि प्रस्तावित इक्विटी प्रतिबद्धताको लगभग ४७ प्रतिशत खर्च भइसकेको छ। होटलले परियोजनाको लागि आवश्यक जग्गा खरिद गरिसकेको छ। यस्तै भवनलगायत अन्य पूर्वाधार बनाउन ठेक्का सम्झौता गरिसकेको जनाएको छ।

ठूला लगानीका होटलले प्रतिफल लिन लामो समय कुर्नुपर्ने हुन्छ। यसबाहेक लक्जरी र वेलनेस क्षेत्रमा परियोजनाको भिन्न स्थितिलाई ध्यानमा राख्दै बजार स्थिति स्थापित गर्ने, लक्षित ग्राहक आधारलाई आकर्षित गर्ने, सन्तोषजनक अधिभोग स्तर र अकुपेन्सी दर प्राप्त गर्नुपर्ने हुन्छ।

रिसोर्टको अध्यक्ष डा. राजेन्द्र केसी रहेका छन्। केसीको शिक्षा, कृषि, आतिथ्य र सामाजिक क्षेत्रहरूमा २६ वर्षभन्दा बढीको अनुभव छ। केसीको लेमन ट्री होटलमा लगानी रहेको छ।

प्रस्तावित लक्जरी रिसोर्ट राजधानीको उत्तरी भागमा रहेको बुढानीलकण्ठमा रणनीतिक रूपमा अवस्थित छ। जहाँ शहरका प्रमुख भागहरूसँग राम्रो सडक सम्पर्क छ।

यो स्थानले व्यावसायिक क्षेत्रहरू, शैक्षिक संस्थाहरू र बूढानीलकण्ठ मन्दिरसहित प्रमुख पर्यटकीय तथा धार्मिक स्थलहरूको निकटताबाट लाभ उठाउने देखिन्छ। बूढानीलकण्ठ फरेष्ट हिल्स सन् २०१९ मा स्थापना भएको हो।