सेयर धितो कर्जाको भरमा बढ्दै सेयर बजार, कारोबार ७ अर्ब नाघ्यो

काठमाडौँः सेयर बजारमा लगानीकर्ताको सक्रियता बढ्न थालेसँगै नेपाल स्टक एक्सचेन्ज (नेप्से) सूचक ३३ अंकभन्दा बढीले उकालो लागेको छ। अघिल्लो कारोबार दिन सामान्य उतारचढावमा सीमित रहेको बजार बुधबार भने उल्लेख्य रूपमा बढेको हो।

बुधबार नेप्से सूचक ३३.२९ अंक बढेर २६६४.०६ विन्दुमा पुगेको छ। सूचकसँगै बजारको कारोबार रकम पनि उल्लेख्य बढेको छ। मंगलबार ५ अर्ब ७९ करोड रुपैयाँको कारोबार भएकोमा बुधबार ३४८ स्टकको ७ अर्ब ४५ करोड ८६ लाख ७७ हजार रुपैयाँ बराबरको १ करोड ९३ लाख ९७ हजार कित्ता सेयर किनबेच भएको छ।

बढ्दो बजारमा जलविद्युत कम्पनी अगाडि

बुधबारको बजारमा हाइड्रोपावर कम्पनीका सेयरमा लगानीकर्ताको आकर्षण देखिएको छ। बेनी हाइड्रोपावर लिमिटेडको सेयर मूल्यमा सकारात्मक सर्किट लागेको छ।

त्यस्तै, बुटवल पावर कम्पनी लिमिटेडको सेयर मूल्य १०.५ प्रतिशतभन्दा बढी बढेको छ। सुपर खुदी हाइड्रोपावर लिमिटेड र एनआरएन इन्फ्रास्ट्रक्चर एन्ड डेभलपमेन्ट लिमिटेडको सेयरमूल्य पनि ६ प्रतिशतभन्दा बढीले उकालो लागेको छ। घट्ने कम्पनीको सेयरमूल्यमा भने ३ प्रतिशतभन्दा कमको गिरावट देखिएको छ।

कारोबार रकमका आधारमा लिबर्टी इनर्जी कम्पनी लिमिटेड शीर्ष स्थानमा रहेको छ। कम्पनीको ३२ करोड ५० लाख रुपैयाँ बराबरको सेयर कारोबार भएको छ।

स्टक ब्रोकर एसोसिएसनका पूर्वअध्यक्ष भरत रानाभाट पछिल्लो समय बजारमा विस्तारै सकारात्मक गति देखिन थालेको बताउँछन्। उनका अनुसार बैंक तथा वित्तीय संस्थाबाट प्रवाह भएको मार्जिन कर्जाको रकम सेयर बजारमा आउन थालेपछि कारोबार बढेको हो।

‘बैंकले आफैँले सेयर किन्नेभन्दा पनि मार्जिन लेन्डिङअन्तर्गत प्रवाह गरेको पैसा व्यापक रूपमा बजारमा आइरहेको छ,’ रानाभाटले नेपाल क्लिक्ससँग भने।

उनका अनुसार बजार केही बढ्न थालेपछि पुराना लगानीकर्ताको पोर्टफोलियोको मूल्य बढ्छ। त्यसले उनीहरूको थप मार्जिन कर्जा लिन सक्ने क्षमता बढाउँछ। बजारमा नाफाको सम्भावना देखिएपछि नयाँ लगानीकर्ता पनि प्रवेश गर्ने भएकाले कारोबार र बजारको गतिविधि थप बढ्न सक्ने उनको भनाइ छ।

नीतिगत स्थिरता भए लगानी बढ्ने अपेक्षा

रानाभाटका अनुसार बजारलाई दिगो रूपमा अघि बढाउन भने पूर्वाधारसँगै नीतिगत स्थिरता महत्वपूर्ण हुन्छ। नेपाल राष्ट्र बैंक र नेपाल धितोपत्र बोर्ड (सेबोन) ले पटक–पटक नीति तथा नियम परिवर्तन गर्ने प्रवृत्ति रोक्न सके लगानीकर्ताको विश्वास बढ्ने उनको भनाइ छ।

‘नियामक निकायले नीति तथा नियममा बारम्बार परिवर्तन गर्ने प्रवृत्ति रोक्न सके लगानीकर्ताहरू आत्मविश्वासका साथ ठूलो लगानी लिएर बजारमा आउन सक्छन्,’ उनले भने।

पछिल्लो समय कारोबार रकम ७ अर्ब नाघ्नु र सूचकमा सुधार देखिनुले शेयर बजारमा लगानीकर्ताको सहभागिता विस्तारै बढ्दै गएको संकेत गरेको छ। यद्यपि, बजारको आगामी दिशा कारोबारको निरन्तरता, तरलता र नीतिगत वातावरणमा निर्भर रहने देखिन्छ।