आईएमई लाइफको ४ करोड कित्ता सेयर नेप्सेमा सूचीकृत

काठमाडौँ- आईएमई लाइफ इन्स्योरेन्स कम्पनी लिमिटेड (आईएलआई)को साधारण सेयर नेपाल स्टक एक्सचेञ्ज लिमिटेड (नेप्से)मा सूचीकरणका भएको छ। कम्पनीका ४ करोड कित्ता साधारण सेयर सूचीकरण भएको हो।

कम्पनीले सर्वसाधारणसमक्ष सिभिल क्यापिटल मार्केट लिमिटेड (धितोपत्र निष्काशन तथा बिक्री प्रबन्धक) मार्फत साधारण सेयर खुल्ला बिक्री आह्वान गरेको थियो। कम्पनीले सर्वसाधारण (वैदेशिक रोजगारीमा रहेका नेपाली, सामूहिक लगानी कोष र कर्मचारीहरु समेत) मा १ करोड २० लाख कित्ता सेयर (३० प्रतिशत) वितरण गरेको थियो।

यस्तै कम्पनीका संस्थापक सेयरधनीहरुको २ करोड ८० लाख कित्ता सेयर (७० प्रतिशत) गरी जम्मा ४ करोड कित्ता साधारण सेयर सूचीकरण भएको हो। दोस्रो बजारमा सेयरको कारोबार आइतबारबाट सुरु गर्ने तयारी नेप्सेले गरेको छ।

कम्पनीको प्रधान कार्यालय काठमाडौं जिल्ला, लैनचौरमा रहेको र सूचीकरण पश्चात् दिनुपर्ने सेयर रजिष्ट्रारसम्बन्धी सम्पूर्ण सेवा ग्लोबल आइएमई क्यापिटल लिमिटेड, नक्साल, काठमाडौंबाट हुनेछ।

हाल कम्पनीले देशभरि आफ्ना १४० शाखा तथा उपशाखा कार्यालयहरु मार्फत सेवाग्राहीहरुलाई जीवन बीमा सेवा उपलब्ध गराउँदै आएको छ। कम्पनी सञ्चालनको छैंटौं वर्षिक उत्सव मनाउने क्रममा रहेको आईएमई लाइफले देशव्यापीरुपमा विविध कार्यक्रम गरी बीमा जागरण एवं सामाजिक उत्तरदायित्व निर्वाह गरिरहेको छ।