श्रीमतीको हत्या आरोपमा श्रीमान् पक्राउ, छातीमा मुक्का हान्दा मृत्यु भएको स्वीकार

आठराई- श्रीमती हत्याको आरोपमा श्रीमान् पक्राउ परेका छन्। तेह्रथुमको आठराई गाउँपालिका-१ डाँडागाउँमा साउन १४ गते २४ वर्षीया श्रीमती रेसिका (दमन्ता) श्रेष्ठको हत्या गरेको आरोपमा उनका श्रीमान् राजकुमार श्रेष्ठ पक्राउ परेका हुन्। उनलाई प्रहरीले सोमबार सार्वजनिक गरेको हो।

साउन २७ गते दमन्ताको शव पसल नजिकै सुँगुरको खोरमा गाडेको अवस्थामा फेला परेको थियो। सोही दिन झापाको काँकडभिट्टास्थित एक होटेलमा लुकेर बसेको अवस्थामा साउन २७ गते प्रहरीले उनलाई पक्राउ गरेको थियो।

साविक थोक्लुङ गाविस वडा नम्बर-२ की रेसिकाको हत्या गरी श्रीमान् राजकुमारले साउन १५ गते प्रहरीमा खोजी गरिदिनका लागि निवेदन दिएका थिए। तर प्रहरीले खोजी सुरु गरेपछि राजकुमारले श्रीमती रेसिका झापामा गएको भन्दै खोजी नगर्न भनेका थिए।

घरायसी विवादमा श्रीमानश्रीमती बीच झगडा भएपछि रिसको आवेगमा छातीमा मुक्का प्रहार गर्दा रेसिकाको मृत्यु भएको अभियुक्त राजकुमारले प्रहरीमा बयान दिएका छन्। आफूले कसुर गरेको स्वीकारेको प्रहरी नायब उपरीक्षक राजन चापागाईँले जानकारी दिए।

साउन १५ गते राजकुमार आफैँले श्रीमती हराएको जानकारी इलाका प्रहरी कार्यालयलाई गराएका थिए। यसपछि प्रहरीले उनको खोजी सुरु गरेको थियो। तर प्रहरीले खोजी सुरु गरेपछि उनी आफैँले श्रीमती रेसिका आफन्तकोमा झापामा गएको भन्दै खोजी नगर्न प्रहरीलाई खबर गरेका थिए।

तेह्रथुममा सुँगुरको खोरमा गाडेको अवस्थामा भेटियो महिलाको शव