धादिङमा ४१ करोड विद्युत् महसुल बक्यौता

धादिङ–धादिङमा विद्युत् बक्यौता उच्च देखिएको छ। नेपाल विद्युत प्राधिकरण धादिङ शाखाका अनुसार ४१ करोड ३८ लाख ४५ हजार ६ सय १६ रुपैयाँ विद्युत महसुल उठ्न बाँकी देखिएको हो।

त्यसमध्ये धुनिबेंसी नगरपालिकामा सञ्चालित युनाइटेड सिमेन्ट उद्योगको मात्र २७ करोड ५९ लाख ६४ हजार ५ सय ५६ रुपैयाँ बाँकी रहेको छ। युनाइटेड सिमेन्टले पुरानो विद्युत् महसुलबारे अदालतमा मुद्दा चलिरहेको छ।

महसुल नतिर्ने १ हजार सात सय ४८ जनाको विद्युत् लाइन काटिए पनि एक सय ७७ ग्राहकले अझैसम्म भुक्तानी नगरेको विद्युत् प्राधिकरण धादिङ शाखाका प्रमुख माधव न्यौपानेले जानकारी दिए। एक सय तीन जनालाई विद्युत प्राधिकरणले धादिङमा कालोसूचीमा राखेको छ। विद्युत् लाइन काटेपछि प्राधिकरणले ४ करोड २६ लाख ७४ हजार दुई सय ४० रुपैयाँ असुली गरेको जनाएको छ।

कालोसूचीमा परेका ग्राहकबाट ३७ लाख १२ हजार तीन सय एक रुपैयाँ असुल गर्न बाँकी रहेको छ। कालोसूचीमा राखेपछि सरकारी बाँकीसरह असुल गर्ने र तिन पुस्तेमा पर्नेलाई विद्युत सेवा नदिने नियमसमेत छ। धादिङ शाखाले गत आवमा एक जना ग्राहकको रकम उठाउन काठमाडौं र भक्तपुरमा समेत उनीहरुको घरमा लाइन काटेको कार्यालय प्रमुख न्यौपानेको भनाइ छ।

धादिङमा विद्युत चोरीको घटना पनि गत वर्षको तुलनामा बढेको छ। चुहावट रोक्न बन्द मिटर फेर्ने, तारले छोएका रुख काट्ने, नांगो तारलाई कालो तारमा रुपमान्तरण र ट्रान्सफरमर थप गरेर विद्युत् सञ्चालन गरे पनि चोरी नियन्त्रण भने अझै गर्न सकेको छैन।

प्राधिकरण धादिङ शाखाका न्यौपानका अनुसार गत आर्थिक वर्षमा मात्रै विद्युत चोरीमा गर्ने दुई सय ९४ जनालाई कारबाहीसमेत गरेको छ। उनीहरुबाट १४ लाख ८१ हजार ९६ रुपैयाँ जरिवाना असुल पनि गरे पनि चोरी निर्मूल पार्न सकेको छैन। यसभन्दा अघिल्लो वर्षमा विद्युत् प्राधिकरण धादिङले एक सय २३ जनालाई विद्युत् चोरीअन्तर्गत कारबाही गरेको थियो।

गत आर्थिक वर्षमा ११ करोड २२ लाख ९१ हजार छ सय ९ युनिट विद्युत बिक्री गरी १ अर्ब दुई करोड दुई लाख ८२ हजार आठ सय ४६ रुपैयाँको विद्युत् बिक्री गरेको पाइएको छ। गत वर्षको तुलनामा यो २५ प्रतिशतले वृद्धि भएको प्राधिकरणले जनाएको छ।