स्वदेश फर्किए स्वास्थ्यमन्त्री, भन्छन्- जनसंख्या र स्वास्थ्यका विषय सँगै लैजान सम्मेलन एकमत

काठमाडौँ- स्वास्थ्य तथा जनसंख्यामन्त्री मोहनबहादुर बस्नेत स्वदेश फर्किएका छन्। इजिप्टको कायरोमा भएको जनसंख्या तथा विकाससम्बन्धी अन्तर्राष्ट्रिय सम्मेलनमा भाग लिएर मन्त्री बस्नेत आइतबार स्वदेश फर्केका हुन्।

इजिप्टको राजधानी कायरोमा भदौ १९ देखि २२ गतेसम्म जनसंख्या तथा विकाससम्बन्धी अन्तर्राष्ट्रिय सम्मेलनमा भाग लिन सोमबार इजिप्ट प्रस्थान गरेका थिए।

स्वदेश फर्केपछि त्रिभुवन अन्तर्राष्ट्रिय विमानस्थलमा पत्रकारहरुसँग संक्षिप्त कुराकानी गर्दै मन्त्री बस्नेतले सम्मेलनमा जनसंख्या, बसाईसराई र अव्यवस्थित बसोबासका कारण स्वास्थ्यमा परिरहेको समस्या र समाधानका उपायबारे छलफल भएको जानकारी दिए।

जनसंख्या र स्वास्थ्यका विषयलाई साथसाथै लैजान नसकिए अन्य क्षेत्रमा पनि विकास गर्न नसकिने कुरामा सम्मेलनमा सहभागी सबै एकमत भएको मन्त्री बस्नेतले जानकारी दिए।

सम्मेलनमा सहभागी हुन आएका विभिन्न देशका स्वास्थ्य मन्त्रीहरु, दातृ निकायका प्रतिनिधिहरु र राजनीतिक नेतृत्वहरुसँग आफूले भेटघाट गरेर रणनीतिक विषयमा छलफल भएको मन्त्री बस्नेतले जानकारी दिए।

फरक प्रसंगमा मन्त्री बस्नेतले आगामी महिना हुने विश्व स्वास्थ्य संगठन (डब्लूएचओ) को दक्षिण पूर्वी एसिया क्षेत्रका लागि क्षेत्रीय निर्देशकका उम्मेदवार नेपालका जनस्वास्थ्यविज्ञ डा शम्भु आचार्यका पक्षमा आफूले नेपाल सरकार र स्वास्थ्यमन्त्रीका हैसियतले सरोकारवाला देशसँग लबिङ गरेको जानकारी दिए।