चक्रपथको दोस्रो खण्ड विस्तारमा चिनियाँको आनाकानी, प्रधानमन्त्रीको भ्रमणमा कुराकानीको तयारी

काठमाडौँ- काठमाडौँ चक्रपथ अन्तर्गतको दोस्रो खण्ड विस्तारमा चिनिँया ठेकेदार कम्पनीले आनाकानी गरेको छ। यसअघि नै पूर्वतयारीका काम पूरा भएपनि आयोजनाको काम सुरु गर्न चिनिँया कम्पनी नआइदिँदा आयोजना निर्माणमा ढिलाइ भएको हो।

चक्रपथको पहिलो खण्ड कंलकीदेखि कोटेश्वरसम्मको सडक चिनिँया अनुदानमा विस्तार गरिएको थियो। त्यसपछि नेपालले चक्रपथको दोस्रो खण्ड कंलकीदेखि चाबहिलसम्म बनाइदिन आग्रह गरेको थियो। उक्त खण्ड विस्तार गर्न चिनिँया सकारात्मक देखिए पनि अहिलेसम्म काम सुरु भने गर्न सकेका छैनन्।

पटकपटक चिनिँया कम्पनीहरुले छिट्टै आयोजनास्थलमा परिचालन हुने वचन दिँदै आएका थिए। तर, सडकको विस्तृत अध्ययन प्रतिवेदन(डीपीआर) समेत नबनाई चिनिँयाहरुले आयोजनालाई अनिर्णयको बन्दी बनाउँदै आएका हुन्। २ महिनाभित्र डीपीआर डिजाइनको काम सक्ने बताएको चिनिँया प्राविधिक टोलीले ७ महिना हुँदासम्म पनि फाइनल डिजाइन दिन सकेको छैन।

यसअघि कंलकीदेखि चाबहिलसम्म सडक विस्तार गर्ने गरी तयार गरिएको डिजाइनअनुसार काम गर्न चिनिँया कम्पनीले नचाहेका हुन्। नारायण गोपालचोकमा निर्मित भौतिक संरचना हटाउन चुनौती, साइट क्लियरेन्स र अन्डरपास बनाउनुपर्नेलगायतका कारणले डिजाइन परिवर्तन गरेर जानुपर्ने आवश्यकता चिनिँयाहरुले ठानेका छन्। उनीहरुले नै डीपीआर बनाएर अघि बढाउन सरकारले यसअघि नै अनुमति दिएको थियो।

‘चिनिँयाहरुले आफ्नो डिजाइनको काम गर्दै होलान्,’ उनले भने, ‘सम्पर्कमै छन् तर, कहिलेसम्म आउँछन् भन्न नसकिएला।’

यसअघि साइट क्लियरेन्स हुनासाथ साइटमा मोबिलाइज हुने बताएका चिनिँया ठेकेदार कहिलेसम्म साइटमा आउने हुन अझै टुंगो छैन्। उक्त सडक विस्तारका लागि चिनिँया कम्पनी तयार भएको र सम्पर्कमै रहेको भौतिक पूर्वाधार तथा यातायात मन्त्रालयका सचिव केशवकुमार शर्माले सिएन नेपाललाई जानकारी दिए। तर, कहिले आउछन् भन्ने यकिन नभएको उनको भनाइ छ।

‘चिनिँयाहरुले आफ्नो डिजाइनको काम गर्दै होलान्,’ उनले भने, ‘सम्पर्कमै छन् तर, कहिलेसम्म आउँछन् भन्न नसकिएला।’

दोस्रो खण्डको सडक विस्तारमा चिनिँयाले आनाकानी गरे पनि प्रधानमन्त्री पुष्पकमल दाहाल प्रचण्डको चीन भ्रमणमा चिनिँया पक्षसँग थप कुराकानी हुने शर्माले बताए।

‘प्रधानमन्त्रीज्यूको चीन भ्रमणका बेला यो विषयमा कुरा उठ्छ। चीन सरकारसँग यस विषयमा पनि थप सुनिश्चितता र सहमति हुन्छ,’ उनले बताए।

प्रधानमन्त्री दाहाल आगामी असोज ५ गतेदेखि १३ गतेसम्म आसन्न चीन भ्रमणमा जाने औपचारिक घोषणा भइसकेको छ। भ्रमणका क्रममा चक्रपथको दोस्रो खण्ड विस्तारका लागि थप पहल हुने मन्त्रालयले जनाएको छ।

चिनिँया हेनान कम्युनिकेसन्स प्लानिङ एन्ड डिजाइन इन्स्टिच्युट कम्पनीले डीपीआर डिजाइनको काम गरिरहेको छ। उक्त सडक खण्ड विस्तारका लागि पूर्वतयारी काम जस्तै रुख कटान, खानेपानीका पाइपहरु, बिजुली र सेवा प्रदायका तारहरु समेत आयोजनास्थलबाट हटाइ सकिएको छ।

आयोजनास्थल वरपरका पर्ने मन्दिर, पोल तथा अन्य भौतिक संरचनाहरु पनि ‘क्लियर’ भइसकेको सडक विभागले जनाएको छ। प्रस्तावित नयाँ डिजाइनअनुसार चिनिँयाहरुले कंलकीदेखि बसुन्धरा चौकीसम्म मात्र विस्तार गर्ने विभागले जनाएको छ।

नारायण गोपालचोक र त्यहाँदेखि चाबहिलसम्म हट्नुपर्ने संरचना हटाउन चुनौती देखिएको छ। त्यसकारण, हाललाई बसुन्धारा चौकीसम्म मात्र विस्तार गर्ने गरी योजना अघि बढेको सडक विभागले जनाएको छ।

साइट क्लियरेन्स भइपछि भने पुनः चाबहिलस्थित पहिलेको गोपीकृष्ण हलसम्म सडकखण्ड विस्तार चिनिँयाबाटै नै हुनेछ। सकभर अन्डरपास र ओभरपास नहुने गरी उक्त सडकखण्डको डिजाइन भइरहेको छ। चक्रपथको दोस्रो खण्डको गल्ती नदोहोर्याउने गरी काम गर्ने चिनिँया पक्षको तयारी छ।

सडकको बीचको भाग ३८ मिटरमा चार लेनसहितको सडक र पैदलयात्रु मार्ग निर्माण हुनेछ। कंलकी बसुन्धरासम्मको ८.५ किलोमिटरको उक्त खण्डलाई ८ लेनमा विस्तार गर्ने योजना छ। चक्रपथको पहिलो खण्ड काठमाडौं र ललितपुर दुवै जिल्लामा परेको थियो भने दोस्रो खण्ड काठमाडौंमा मात्र पर्नेछ।