पूर्वआईजीपी प्रधान भन्छन्- शर्मिलालाई लागेको गोली वारपार भएको छ, पीएसओ दिनभर मसँगै थिए

काठमाडौँ- पूर्वप्रहरी महानिरीक्षक ध्रुवबहादुर प्रधानको निवास महाराजगञ्जमा हो।

उनका लागि नेपाल प्रहरीले प्रहरी सहायक निरीक्षक (असई)लाई पीएसओ (पर्सनल सुरक्षा गार्ड) सुम्पेको छ।

राप्रपा सांसदसमेत रहेका प्रधान महाराजगञ्ज निवासबाट बुधबार बिहान सवा ९ बजेतिर निस्केका थिए।

उनको साथमा पिएसओ लक्ष्मण चौधरी थिए। प्रधान घरबाट सिधै सिंहदरबार गए। त्यसपछि पुलिस अस्पतालमा एक जना बिरामीलाई भेट्न पुगेका थिए।

त्यसपछि फेरि प्रधान सिंहदरबार फर्किए। त्यहाँ कानुन समितिको बैठक थियो। उनी त्यहाँ बसेर छलफल गरे।

‘म अपराह्न साढे पाँच बजेतिर घर आएको थिएँ, लक्ष्मण त्यसपछि मेरो निवासबाट आफ्नो डेरा लागेका थिए,’ प्रधानले नेपाल क्लिक्ससँग भने, ‘त्यसपछि कहाँ गए मलाई थाहा भएन।’

आफ्नो घरबाट लक्ष्मण बस्ने ठाउँ मोटरसाइकलमा करिब पाँच मिनेट टाढा रहेको प्रधानले बताए।

‘मैले पौने ९ बजेतिर घटना भएको थाहा पाएँ, म झट्टै पुग्दा प्रहरी महानिरीक्षक वसन्त कुँवर घटनास्थलमा आएर फर्किरहनुभएको थियो,’ प्रधानले भने।

घटना भएको बेला लक्ष्मण कोठाबाहिर रहेको आफूले जानकारी पाएको प्रधानले बताए।

‘कोठाको ढोका बन्द थियो, त्यसबेला गोली चल्यो भन्ने मैले सुनेको हो,’ प्रधानले भने।

लक्ष्मणकी श्रीमतीको कोखामा गोली लागेको छ। कोठामा गोली चलेको र त्यहाँ खोका बरामद भएको आफूले थाहा पाएको प्रधानले बताए।

‘लोड गरेर राखेको पेस्तोल पड्केको भन्ने कुरा आएको छ, यसबारे प्रहरीले अनुसन्धान गर्ला,’ उनले भने, ‘त्यो बेला लक्ष्मण कोठामा नरहेको बुझिएको छ।’

जिल्ला प्रहरी परिसर काठमाडौंका प्रवक्ता प्रहरी उपरीक्षक कुमोध ढुंगेलले पनि पेस्तोल खेलाउने क्रममा गोली चलेको हुनसक्ने आशंका गरे। ढुंगेलका अनुसार नाइन एमएम पेस्तोलबाट गोली चलेको छ।

शर्मिलालाई अहिले उपचारका लागि त्रिवि शिक्षण अस्पताल महाराजगञ्ज पठाइएको छ। उनको अवस्था गम्भीर रहेको बताइएको छ।

‘दिनभर म सँग थिए, फर्केपछि के भयो मलाई थाहा भएन, कुनै विवाद भएको मलाई थाहा थिएन,’ प्रधानले भने।

घटना के कसरी भयो आफैं अचम्ममा परेको प्रधान बताउँछन्।

‘शर्मिलालाई भेट्न म अस्पताल पुगें, गोली वारपार भएको अवस्था छ,’ उनले भने।

पूर्वप्रहरी महानिरीक्षक ध्रुवबहादुर प्रधानका पिएसओकी श्रीमतीमाथि गोली प्रहार