बझाङमा १२ भूकम्प

काठमाडौँ– सुदूरपश्चिम प्रदेशको बझाङलाई केन्द्रबिन्दु बनाएर भूकम्प जाने क्रम जारी छ।

राष्ट्रिय भूकम्प मापन तथा अनुसन्धान केन्द्रका अनुसार मङ्गलबार अपराह्न २:४० बजे बझाङको तालकोट केन्द्रबिन्दू भएर ५.३ म्याग्निच्युडको भूकम्प गएको थियो।

खानी तथा भूगर्भ विभागका महानिर्देशक रामप्रसाद घिमिरेले बझाङका विभिन्न ठाउँ केन्द्रबिन्दु भएर मङ्गलबारदेखि ४ म्याग्निच्युडभन्दा माथिका १२ भूकम्प गइसकेको जानकारी दिए।

राष्ट्रिय भूकम्प मापन तथा अनुसन्धान केन्द्रका अनुसार दोस्रोपटक ३:०६ बजे बझाङको जिल्ला सदरमुकाम चैनपुर भएर ६. ३ रेक्टर स्केल, ३:१३ बजे चैनपुर केन्द्रबिन्दु भएर ४.१ रेक्टरस्केल, ३:४५ बजे सुरमा केन्द्रबिन्दु भएर ४.१ म्याग्निच्युडको भूकम्प गएको हो।

यस्तै दिउँसो ४:२८ बजे तालकोट केन्द्रबिन्दु भएर ४.१ म्याग्निच्युड, ४:३१ बजे सुवेडा केन्द्रविन्दू भएर ४.३ म्याग्निच्युड, ५:१९ बजे सेली केन्द्रबिन्दु भएर ५ म्याग्निच्युड र ५:३८ बजे दामेना केन्द्रबिन्दु भएर ५ म्याग्निच्युडको भूकम्प गएको सो केन्द्रले जनाएको छ।

यसैगरी गएराति १२:१६ बजे दामेना केन्द्रबिन्दु भएर ४.१ म्याग्निच्युड, १२:५० बजे तालकोट केन्द्रबिन्दु भएर ४.३ र आज बिहान ४:२७ बजे ४.३ म्याग्निच्युड र ५:४३ बजे चैनपुर केन्द्रबिन्दु भएर ४.३ म्याग्निच्युडको भूकम्प गएको हो ।

केन्द्रका भूगर्भविद् डा लोकविजय अधिकारी नेपाल भूकम्प जोखिमको क्षेत्र रहेकाले जुनै पनि बेला भूकम्प जानसक्ने बताउँछन्।

‘विगत पाँच सय वर्षदेखि पश्चिम नेपालमा भूकम्प गएको थिएन, पछिल्लो ठाउँमा उक्त क्षेत्रमा भूकम्प जान थालेको छ,’ उनले भने।

यसअघि गत कात्तिकमा डोटी केन्द्रबिन्दु भएर ५.७ रेक्टरस्केलको भूकम्प गएको थियो।

सुदूरपश्चिम क्षेत्रमा अझै केही दिन पराकम्पन आउने उनले जानकारी दिए।

बझाङमा भूकम्पपछिको सुख्खा पहिरोमा परेर मंगलबारदेखि बेपत्ता भएकी महिलाको शव फेला परेको छ।

टिमुर टिप्न मंगलबार दिउँसो गाउँनजिकैको जङ्गलमा गएकी जयपृथ्वी नगरपालिका–११ ओखल गाउँकी गुनमति धामीको शव बुधबार प्रहरीले फेला परेको जिल्ला प्रहरी कार्यालय बझाङका इन्स्पेक्टर दीपेश चौधरीले जानकारी दिए।

इन्स्पेक्टर चौधरीको नेतृत्वमा उनको खोजीका लागि टोली खटिएको र पहिरोमा च्यापिएको अवस्थामा फेला परेको जानकारी उनले दिए।

यसबाहेक मानिस हाताहाती भएको जानकारी प्राप्त नभएको जिल्ला प्रशासन कार्यालय बझाङले जानकारी दिएको छ।

भूकम्पबाट बझाङमा मात्रै हालसम्म ३३६ भौतिक संरचनामा क्षति पुगेको प्रमुख जिल्ला अधिकारी नारायण पाण्डेले जानकारी दिए। यद्यपि क्षतिको विवरण संकलनको काम भइरहेको उनले बताए।

भूकम्पमा परी १८ जना घाइते भएका छन्। १० जना उपचारपछि घर फर्किसकेका छन्। दुई जनालाई जिल्ला अस्पतालमा राखेर उपचार भैरहेको छ भने बाँकीलाई हात तथा खुट्टामा लागेको चोटको कारण थप उपचारको लागि जिल्लाबाहिर पठाइएको छ।

घाइते हुनेहरुमा जयपृथ्वी नगरपालिकामा, मस्टा, केदारस्युँ, खप्तडछान्ना र बित्थडचिर गाउँपालिकाका विद्यार्थी र स्थानीय रहेका छन्।

भूकम्पका कारण घर,सरकारी कार्यालय,विद्यालयका भवनमा क्षति पुग्नाका साथै त्यसपछि गएको सुख्खा पहिरोको कारण राजमार्ग समेत अवरुद्ध भएको छ।

भूकम्पले छिमेकी जिल्ला बाजुरा, दार्चुला, बैतडीलगायतका जिल्लामा भौतिक क्षति गरेको छ।

बाजुराका खप्तड छेडेदह गाउँपालिका, बुढीगंगा र बडीमालिका नगरपालिकालगायत क्षेत्रका थुप्रै घर तथा भवनमा आशिंक र पूर्ण क्षति गरेको बताइएको छ।

बैतडीमा पनि दुई जना घाइते भएका छन्।

माथिबाट खसेको ढुंगा लागेर डिलासैनी र सिगास गाउँपालिकामा एक/एक जना घाइते भएको प्रहरीले जनाएको छ।

भूकम्पले सिगास, डिलासैनी गाउँपालिका, पुर्चौडी र पाटन नगरपालिकामा दर्जनभन्दा बढी घर र विद्यालयका भवन चर्किएको छ।

दार्चुलाको मार्मा गाउँपालिकामा वडा कार्यालय, विद्यालय भवनलगायतका संरचनामा क्षति पुगेको छ।

बाजुरा भूकम्प र त्यसपछिको परकम्पका कारण भएको क्षतिको विवरण संकलन, उद्धार र राहत लगायतका कार्य भैरहेको अधिकारीहरुले जनाएका छन्।