प्रधानमन्त्री र भाषा आयोगका पदाधिकारीबीच भेट, सिफारिस संशोधन गर्न प्रस्ताव

काठमाडौँ- प्रधानमन्त्री पुष्पकमल दाहाल ‘प्रचण्ड’सँग भाषा आयोगका अध्यक्षसहितका पदाधिकारीहरुले आज भेटवार्ता गरेका छन्।

प्रधानमन्त्री तथा मन्त्रिपरिषद्को कार्यालय सिंहदरबारमा भेट भएको हो।

भेटमा भाषा आयोगका पदाधिकारीले सरकारी कामकाजको भाषासम्बन्धी पहिले भएका सिफारिसहरुमा संशोधन गर्न प्रस्ताव गरेका थिए।

त्यसैगरी भेटवार्तामा आयोगभित्र रहेका व्यवस्थापनका आन्तरिक समस्या र तिनका समाधानबारे पनि छलफल भएको थियो।

त्यस्तै, आज नेपाल ट्रष्टका पदाधिकारीहरुले पनि ट्रष्टको नामका रहेको सम्पत्ति र त्यसको उपयोगबारे प्रधानमन्त्री प्रचण्डसँग छलफल गरेको छ।

छलफलका क्रममा ट्रष्टका सम्पत्तिको अभिलेख राख्ने र उपयोगका विधिबारे पनि चर्चा भएको थियो।

त्यसैगरि निर्माण व्यवसायी महासंघका अध्यक्ष रवी सिंहसहित आएको प्रतिनिधि मण्डलले पनि प्रधानमन्त्रीसँग भेटवार्ता गरेको छ। भुक्तानी सम्बन्धी आफूहरुको मागमा कुनै सुनुवाई नभएको भन्दै उनीहरुले प्रधानमन्त्रीको ध्यानाकर्षण गराएका थिए।

प्रधानमन्त्री प्रचण्डले निर्माण व्यवसायीहरुको मागप्रति आफ्नो ध्यानाकर्षण भएको र मागको उचित सम्बोधन हुने बताए।