परिवारको सम्पर्कमा आए सिक्किमको बाढीपछि सम्पर्कविहीन ५ नेपाली

इलाम- भारतको सिक्किममा गएको पहिरो तथा टिस्टा नदीको बाढी पछि सम्पर्कविहीन भएका इलामका पाँच जना परिवारको सम्पर्कमा आएका छन्।

परिवारका सदस्यसँग फोन तथा सामाजिक सञ्जालमा उनीहरूले कुराकानी गरेका हुन्।

सम्पर्कमा आउनेमा इलाम नगरपालिका–९ का सेनबहादुर कार्की, कुमार बस्नेत, नरमाया बस्नेत, खुशी कार्की र लाक्पा लामा छन्।

उनीहरू ११ दिनपछि परिवारको सम्पर्कमा आएसँगै परिवारमा समेत खुसीयाली छाएको छ।

परिवारसँग सम्पर्क गरेको जानकारी प्राप्त भएको इलामका सहायक प्रमुख जिल्ला अधिकारी ध्रुवप्रसाद कोइरालाले जानकारी दिए।

सम्पर्कमा आएका पाँचै जना स्वदेश फर्किदै गरेको पनि परिवारका सदस्यबाट जानकारी प्राप्त भएको उनले बताए।

टिस्टा नदीमा बाढी आएपछि नेपाली बसोबास गर्ने स्थल तथा आसपासमा विद्युत्समेत कटौती भएको थियो।

विद्युत् नहुँदा टेलिफोन तथा अन्य सञ्चारका साधनसमेत अवरुद्ध भएकाले सम्पर्क स्थापित हुन नसकेको जनाइएको छ।

असोज १६ गते दिन सिक्किमको उत्तरी भेगको हिमतालको माथिल्लो तटीय क्षेत्रमा मुसलधारे वर्षापछि गएको पहिरो र टिस्टा नदीमा बाढी आउँदा ठूलो क्षति भएको छ।

उक्त बाढीपहिरोमा परी ८२ जनाको मृत्यु भएको छ भने १४२ जना हराइरहेको टाइम्स अफ इन्डियामा समाचार छ।