४ खर्बको आयात गर्दा ३ खर्ब ६६ अर्ब व्यापार-घाटा

काठमाडौँ- चालु आर्थिक वर्षको तेस्रो महिनासम्ममा मुलुकले रु ४ खर्ब ७ अर्ब ७५ करोड ८९ लाख बराबरका मालवस्तुको आयात गरेको छ।

गत आर्थिक वर्षको सोही अवधिमा रु ४ खर्ब ९९ करोड बराबरको वस्तु आयात भएको थियो। यो गत वर्षको भन्दा १.६९ प्रतिशतले बढी हो।

विभागको असोज मसान्तसम्मको विवरणअनुसार तीन महिनाको अवधिमा नेपालको निर्यात २.२६ प्रतिशतले ओरालो लागेको छ।

विभागका अनुसार सो अवधिमा नेपालबाट रु ४० अर्ब ८७ करोड ४८ लाख बराबरको मालवस्तु निर्यात भएको छ। गत वर्षको तीन महिनाको अवधिमा रु ४१ अर्ब ८२ करोड बराबरको निर्यात भएको थियो।

सो अवधिमा नेपालको वैदेशिक व्यापार रु ४ खर्ब ४८ अर्ब ६३ करोड बराबरको वैदेशिक व्यापार भएको छ।

गत वर्षको यही अवधिमा रु ४ खर्ब ४२ अर्ब ८१ करोड बराबरको वैदेशिक व्यापार भएको थियो।

विभागका अनुसार असोज मसान्तसम्म नेपालको व्यापार घाटा रु ३ खर्ब ६६ अर्ब ८८ करोड बराबर रहेको छ।

गत वर्षको सोही अवधिमा रु ३ खर्ब ५९ अर्ब १७ करोड बराबरको व्यापार घाटा भएको थियो।