कतार जाँदै परराष्ट्रमन्त्री‍, विपीन जोशीको रिहाइका लागि पहल गर्ने

काठमाडौँ- परराष्ट्रमन्त्री एनपी साउद कतार भ्रमणमा जाने भएका छन्। साउद मंसिर २३ मा कतार जाने तयारी रहेको मन्त्रीको सचिवालयले जानकारी दिएको हो।

भ्रमणमा उनले हमासको कब्जामा रहेका भनिएका नेपाली नागरिक विपीन जोशीको रिहाइका लागि पहल गर्ने परराष्ट्र मन्त्रालयले जानकारी दिएको छ।

यसअघि मंसिर ८ गते परराष्ट्रमन्त्री साउदले कतारका विदेश राज्यमन्त्री सुल्तान बिन साद अल-मुखैरीसँग मन्त्रालयमा भएको भेटमा रिहाईका लागि पहल गरिदिन आग्रह गरेका थिए।

जवाफमा कतारका विदेश राज्यमन्त्री मुखैरीले जोशीको यथाशीघ्र रिहाईका लागि यथाशक्य सहयोग गर्ने आश्वासन दिएका थिए।

त्यसअघि मंसिर ७ गते (बिहीवार) उनले जोशीको रिहाईका लागि इजरायलका राजदूतलाई मन्त्रालयमा बोलाएर कुरा गरेका थिए।

परराष्ट्रमन्त्री साउदले बुधबार कञ्चनपुर सदरमुकाम महेन्द्रनगरमा जोशीका बुवाआमासँग पनि भेट गरेका छन्।

दोहा फोरमको कार्यक्रममा सहभागी हुन साउद कतार जान लागेका हुन्। डिसेम्बर १० देखि सुरु हुने कार्यक्रम दुई दिनसम्म चल्ने छ।

कतारकै मध्यस्थतामा इजरायल र हमास समूहबीच गाजामा युद्धविराम गर्ने सहमति भएको छ। कतारले खेलेको मध्यस्थताको भूमिकाको दुवै पक्षले सह्राना गर्दै आएका छन्।