गृहमन्त्री नारायणकाजीले गरे त्रिभुवन विमानस्थल निरीक्षण

काठमाडौं– उपप्रधान एवं गृहमन्त्री नारायणकाजी श्रेष्ठसहितको टोलीले त्रिभुवन अन्तर्राष्ट्रिय विमानस्थल अनुगमन र निरीक्षण गरेको छ। मन्त्री श्रेष्ठ गृहसचिव विनोदप्रकाश सिंह र अध्यागमन विभागका महानिर्देशक झलकराम अधिकारीलाई सँगै लिए विमानस्थल निरीक्षणमा पुगेका थिए।

त्रिभुवन विमानस्थलमा नागरिकलाई सास्ती दिने घटना बढेपछि अनुगमनमा निस्कनुपरेको गृहमन्त्री श्रेष्ठले बताए। शुक्रबार मात्रै सदनमा सांसदहरुले त्रिभुवन विमानस्थलमा विदेश रोजगारीका क्रममा मृत्यु भएकाको शव बाकस नेपाल ल्याउँदासमेत कर्मचारीले फुटाउने गरेको गुनासो पोखेका थिए।

उपप्रधानमन्त्री श्रेष्ठलाई अध्यागमन कार्यालय प्रमुख अध्यागमन अधिकृत रामबाबु सुवेदी, नागरिक उड्डयन कार्यालयका महाप्रबन्धक प्रमुख प्रतापबाबु तिवारी एवं सुरक्षा निकायका अधिकारीले विमानस्थल प्रशासनका चालू गतिविधि र नयाँ योजनाबारे रिपोर्टिङ गरेका थिए।

गृहमन्त्री श्रेष्ठले विमानस्थलको हेल्प डेस्कलाई प्रभावकारी बनाउन र सेवाग्राहीलाई दुःख नदिन विमानस्थल प्रशासनलाई आग्रह गरे। विमानस्थलको तत्काल र दीर्घकालीन सुधारका लागि १५ दिनभित्र पुनर्संरचना प्रस्ताव प्रस्तुत गर्न उनले निर्देशन दिए। उनले भने, ‘अन्तर्राष्ट्रिय विमानस्थल राष्ट्रिय पहिचान हो,’ श्रेष्ठले भने, ‘यहाँबाट अपराध आयात नहोस् भनेर हामी अतिरिक्त सक्रिय हुनु जरुरी छ।’

विमानस्थल प्रशासन नेपाल घुम्न आउने विदेशी पर्यटक र विदेशमा रोजगारी गर्न जाने नेपाली श्रमिकप्रति सहृदयी हुनु जरुरी रहेको उपप्रधानमन्त्री श्रेष्ठको भनाइ थियो। विप्रेषणबाट देशको अर्थतन्त्र धानिरहेका वैदेशिक श्रमिकलाई हेप्ने, दुःख दिने र झन्झट थोपर्ने काम सैह्य नहुने उनले चेतावनी दिए।