सांसदलाई कांग्रेसको निर्देशन : संसद चलेका बेला काठमाडौँबाहिर जानुपरे स्वीकृति लिनू

काठमाडौँ– नेपाली कांग्रेसले संघीय संसदको बैठक चलिरहेको बेला सांसदले काठमाडौँबाहिर जानुपरे लिखित स्वीकृति लिन निर्देशन दिएको छ। शुक्रबार बसेको कांग्रेस संसदीय दलको प्रमुख सचेतक वा सचेतकसँग लिखित स्वीकृत लिन निर्देशन दिएको हो।

अत्यवाश्यक कार्यले राजधानी बाहिर जानु परेमा कारण पनि खुलाउनु पर्ने दलले निर्देशन दिएको हो।

‘देशको सबैभन्दा ठूलो पार्टीका रुपमा स्थापित कांग्रेसले संसदको प्रभावकारिता जिम्मेवार रुपमा काम गर्नुपर्दछ,’ बैठकको निर्णय सुनाउँदै प्रमुख सचेतक लेखकले भने।

पार्टी सभापति शेरबहादुर देउवाले सांसदहरुलाई समिति र संसदमा थप क्रियाशील हुन निर्देशन दिए। नागरिकका सरोकारका मुद्दा संसदमा उठाउने प्रतिवद्धता कांग्रेसले बैठकमार्फत गरेको छ।

गणपूरक संख्या नपुगेर संसद बैठक अवरुद्ध हुने र समितिको बैठक पनि प्रभावित हुने अवस्थाको अन्त्य गर्न पार्टीेले सांसदहरुलाई उत्तरदायी गराउने निर्णय लिएको लेखकले बताए।

कोशीमा राष्ट्रिय सभा गठबन्धनका एक उम्मेदवार पराजित हुनु अनेपेक्षित भएको ठहर बैठकले गरेको छ।

बैठकमा सांसदद्वय चन्द्र भण्डारी र विनोद चौधरीले समय लिएर बोलेका थिए। उद्योगपति तथा व्यवसायी समेत रहेका चौधरीले सरकारले पूर्वाग्रह साँधेर आफ्ना भाइ अरुण चौधरीलाई पक्राउ गरेको आरोप लगाए।

पार्टी र संसदीय समितिलाई संयोजन गर्ने सांसदहरुलाई जिम्मेवारी बैठकले दिएको छ।

समितिमा पार्टीबाट तोकिएका संयोजकहरुः
१. अर्थ समिति – रामनाथ अधिकारी
२. अन्तराष्ट्रिय सम्बन्ध र पर्यटन समिति – डा. नारायण खड्का
३. उद्योग तथा वाणिज्य र श्रम तथा उपभोक्ता हित समिति – रमा कोइराला पौड्याल
४. कानून न्याय तथा मानव अधिकार समिति – नागिना यादव
५. कृषि, सहकारी तथा प्राकृति स्रोत समिति – कुसुमदेवी थापा
६. महिला तथा सामाजिक मामिला समिति – आशा विक
७. राज्य व्यवस्था तथा सुशासन समिति – दिलेन्द्रप्रसाद वडू
८. पूर्वाधार विकास समिति – दिनेश कुमार यादव
९. शिक्षा स्वास्थ्य तथा सूचना प्रविधि समिति – लिलादेवी बोखिम (लिम्वू)
१०. सार्वजनिक लेखा समिति – श्यामकुमार घिमिरे