कांग्रेस बैठकको बीचमै प्रचण्ड भेट्न बालुवाटार पुगे देउवा

काठमाडौँ– नेपाली कांग्रेसका सभापति शेरबहादुर देउवाले आफ्नै घरमा भइरहेको कांग्रेसका शीर्ष नेताहरूको बैठकको बीचमा नेकपा माओवादी केन्द्रका अध्यक्ष पुष्पकमल दाहाल प्रचण्डलाई भेटेका छन्।

प्रधानमन्त्री निवास बालुवाटार पुगेर सभापति देउवाले प्रचण्डसँग भेट गरेका हुन्।

पार्टीका महामन्त्री गगन थापाले महासमिति बैठकमा प्रस्तुत गर्न लागेको सांगठनिक प्रतिवेदनका विषयमा देउवा निवासमा बैठक चलिरहेको थियो।

थापाको प्रतिवेदनमा भविष्यमा चुनावअघि कुनै पनि दलसँग गठबन्धन नगर्ने विषय उल्लेख छ। उक्त विषयलाई हटाउन देउवाले महामन्त्री थापालाई निरन्तर दबाब दिँदै आइरहेका छन्।

सोमबारको बैठक पनि देउवाले थापाको प्रतिवेदनलाई बदल्नका लागि दबाब दिनका लागि बोलाएका थिए।

आगामी चुनावमा गठबन्धन गर्ने र नगर्ने पक्षबीच विवाद चर्किइरहेका बेला देउवा र उपसभापतिसमेत रहेका उपप्रधान तथा रक्षामन्त्री पूर्णबहादुर खड्का बालुवाटार पुगेको विषयले पार्टीमा तरंग पैदा गरेको छ।

देउवा, दाहाल र खडकाले झन्डै आधा घण्टा कुराकानी गरेको बालुवाटार स्रोतको भनाइ छ।

थापाको उक्त प्रस्ताव पारित भएमा माओवादीले साथ छोड्ने र एमालेलगायतका दलसँग मिलेर सत्ताबाट पाखा पार्ने सक्ने भय देउवामा छ। त्यसै विषयमा प्रचण्डलाई आश्वस्त पार्न देउवाले प्रचण्डलाई भेट गरेका गरेको स्रोतको भनाइ छ।