राष्ट्रिय सभा अध्यक्षमा माओवादीका दाहाल निर्वाचित, पक्षमा ३९ मत

काठमाडौँ- राष्ट्रियसभा अध्यक्षमा नारायण दाहाल निर्वाचित भएका छन्। दाहाललाई निर्वाचित गरियोस् भन्ने प्रस्तावका पक्षमा बहुमत सांसदले मत जाहेर गरेपछि उनी अध्यक्षमा निर्वाचित भएका हुन्।

दाहालका पक्षमा ३९ मत परेको थियो भने विपक्षमा १७ मत परेको थियो।

दाहालले पाएको मत सभाको बहुमत भएकाले उनी निर्वाचित भएको सभाले घोषणा गरेको छ।

उनी नेकपा माओवादी केन्द्रका अध्यक्ष तथा प्रधानमन्त्री पुष्पकमल दाहालका भाइ हुन्।

यसअघि मंगलबारकै बैठकमा नेपाली कांग्रेसका उम्मेदवार युवराज शर्मालाई राष्ट्रिय सभा अध्यक्ष पदमा निर्वाचित गरियोस् भन्ने प्रस्तावका पक्ष/विपक्षमा मतदान भएको थियो।

शर्माका पक्षमा नेपाली कांग्रेसका १६ र लोसपाका एक सांसदले मत दिएका थिए।

५६ सांसद सहभागी बैठकमा शर्माको विपक्षमा ३९ मत परेको थियो। शर्माका पक्षमा परेको मत सभामा कायम सांसद संख्याको बहुमत नभएकाले दोस्रो प्रस्तावका मतदान भएको थियो।

गठबन्धनका दाहालले एमाले, माओवादी, नेकपा एस र जसपाको समर्थन पाए।

राष्ट्रिय सभामा एमालेका १०, माओवादीका १८, नेकपा एसका ८ र जसपाका तीन सांसदले समर्थन गरेका थिए।

अध्यक्षमा निर्वाचित दाहालको परिवार भरतपुर महानगरपालिका वडा नम्बर १४ मा बस्दै आएका छन्।

२०३१ सालमा उनले कम्युनिस्ट पार्टीको सदस्यता लिएका थिए।

२०६० सालमा नेकपा (माओवादी) भेरी कर्णाली ब्युरोअन्तर्गत जाजरकोट, सुर्खेत र डोल्पा इन्चार्ज बनेका थिए। २०६३ सालको अन्तरिम व्यवस्थापिका सदस्य दाहाल पहिलो संविधान सभामा चितवनको निर्वाचन क्षेत्र नम्बर ३ बाट चुनाव जितेका थिए।

२०७८ चैत २५ गते मन्त्रिपरिषद्को सिफारिसमा राष्ट्रपतिले दाहाललाई राष्ट्रिय सभा सदस्य बनाएका थिए।

राष्ट्रिय सभामा उनको कार्यकाल सकिन चार वर्ष बाँकी छ।