विश्वासको मतका लागि प्रस्ताव गर्दै गण्डकीका मुख्यमन्त्री

पोखरा- गण्डकी प्रदेशका मुख्यमन्त्री खगराज अधिकारीले शनिबार प्रदेशसभामा विश्वासको मत लिँदै छन्। संघमा नयाँ समीकरण बनेसँगै गण्डकीमा एमाले नेतृत्वको सरकारलाई दिएको समर्थन नेकपा माओवादी केन्द्रले फिर्ता लिएपछि अधिकारीले विश्वासको मत लिने तयारी गरेका हुन्।

गत चैत १० गतेदेखि अल्पमतका मुख्यमन्त्री अधिकारीले त्यसको ३० दिनपछि प्रदेशसभामा विश्वासको मतका लागि प्रस्ताव पेस गर्दैछन्।

विश्वासको मत लिनुअघि मुख्यमन्त्री अधिकारीले शुक्रबार पत्रकार सम्मेलन आयोजना गरी आफूले गरेका कामका विवरण सार्वजनिक गरेका थिए। आफूले कसैको सरुवाबढुवा तथा नियुक्तिमा चासो नदिएको दाबी थियो। यसका साथै आयोजना उद्घाटन गर्ने व्यक्तिको नाम शिलालेखमा लेखिने कुरामा पनि आफूलाई थाहै नभएको उनको जिकिर थियो।

६० सदस्यीय प्रदेशसभामा कांग्रेसका २७, एमालेका २२, माओवादीका ८, राप्रपाका २ र एक स्वतन्त्र सांसद छन्। गण्डकीमा कांग्रेस र माओवादी मिल्दा सहजै सरकार बन्ने अवस्था छ। तर एमालेले भने माओवादीसँग सरकारलाई समर्थन दिन आग्रह गर्दै आएको छ।

शिलालेखमा नाम मात्रै झुन्ड्याएको आरोप लागेपछि मुख्यमन्त्री अधिकारी भन्छन्- मलाई थाहै थिएन