क्यानका पदाधिकारीमाथि छानबिन गर्न एमालेको माग

काठमाडौँ- नेकपा एमालेका सांसद भीम आचार्यले क्यानका पदाधिकारीमाथि छानबिन गर्न माग गरेका छन्। बुधवारको प्रतिनिधिसभा बैठकमा बोल्दै एमाले नेता आचार्यले यस्तो माग गरेका हुन्।

टी–२० विश्वकप क्रिकेटका लागि नेपाली टीमको चिकित्सक कोटामा क्यान अध्यक्ष चतुर बहादुर चन्दले आफ्नी श्रीमतीलाई पठाएकोतर्फ संकेत गर्दै उनले उक्त विषयमा छानबिन गर्नुपर्ने उनको माग छ। नेपाली टोलीमा सन्दीप लामिछानेलाई १५ जनाको टिममा सहभागी नगराएर भिसा पाउनबाट वञ्चित गराएको पनि उनको आरोप छ।

खेलाडीलाई होटलमा खेलाडीलाई उभ्याएको, जर्सी अमेरिका लगेर महँगोमा बेचेको गुनासो आएको तथा अमेरिकामा बस्ने नेपालीहरूले अवैध रूपमा चन्दा उठाएर क्यानको खातामा नराखेको लगायतका अनियमितताका गुनासाहरू व्यापक आएको बताए।

८० डलर पर्ने टिकट १३५ रुपैयाँमा क्यान नेतृत्वले बेचेको भन्दै क्यान नेतृत्वले आर्थिक अपचलन गरेको, नेपाललाई जिताउन नभई हराउन भूमिका खेलेको र खेलाडीको शिर निहुराउने काम गरेको भनेर खेलाडीबाटै गुनासो आएको पनि उनको भनाइ छ।

‘केही दिनअघि प्रधानमन्त्री कार्यालयको लेटरप्याड दुरुपयोग गरेर विश्वकप हेर्न अमेरिका पठाइदिने भन्दै मानव तस्करीको कोसिस गरिएको कुरा प्रधानमन्त्रीको कार्यालयले रोकेको थियो’, आचार्यले भने, ‘त्यो आरोप पनि क्यानको नेतृत्वको मिलेमतोमा भएको भन्ने गुनासो आइरहेको छ।’

उनले विश्वकपमा नेपाललाई हराउन भइरहेको षडयन्त्रलगायतका गलत क्रियाकलापको छानबिन गर्न निष्पक्ष छानबिन आयोग गठन गरेर छानबिन गरेर कारबाही गर्नुपर्ने भन्दै संसद्मार्फत सरकारको ध्यानाकर्षण गराए।