टीआरसीमा भएको सहमति बारे प्रधानमन्त्रीलाई ब्रिफिङ

काठमाडौँ- सङ्क्रमणकालीन न्याय सम्बन्धी विधेयक (टीआरसी) बारे कार्यदलस्तरमा भएका सहमतिबारे प्रधानमन्त्री केपी शर्मा ओलीले ब्रिफिङ लिएका छन्।

टीआरसी विधेयकमा सहमति जुटाउन गठित कार्यदलका सदस्य तथा सत्तारुढ दलका मुख्य सचेतक महेश बर्तौलासँग सोमबार प्रधानमन्त्री ओलीले औपचारिक रूपमा ब्रिफिङ लिएका हुन्।

एमाले प्रमुख सचेतक समेत रहेका बर्तौलाले कार्यदलस्तरमा अहिलेसम्म भएका सबै सहमतिबारे मौखिक रूपमा प्रधानमन्त्रीलाई ब्रिफिङ गरेको जानकारी दिए।

‘कार्यदलस्तरमा अहिलेसम्म भएका छलफल, सहमति र प्रगतिबारे प्रधानमन्त्रीज्यूलाई ब्रिफिङ गरिएको छ’, बर्तौलाको भनाइ छ।

टीआरसी विधेयकमा यसअघि दलहरूबिच रहेका असहमतिबारे साउन १७ गते सरोकारवालासहित बसेको बैठकमा सहमति जुटेको दलका नेताहरूले बताएका थिए।

उक्त विधेयकमा सहमति जुटाउन एमालेबाट बर्तौला, कांग्रेसबाट गृहमन्त्री समेत रहेका रमेश लेखक र माओवादी केन्द्रका नेता जनार्दन शर्मा रहेको कार्यदल गठन गरेको थियो।

कार्यदलमा जुटेको सहमतिको लिखित प्रतिवेदन तीन दलका शीर्ष नेतालाई संयुक्त बुझाउने तयारी छ। जुटेको सहमतिबारे प्रधानमन्त्रीले ब्रिफिङ लिएपछि कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डसहितको बैठक बोलाउने तयारी गरेका छन्।

प्रधानमन्त्रीले नेताहरूसँगको समय मिलाएर बैठक डाकेपछि कार्यदलका सदस्यहरूले तीनै जना नेतालाई संयुक्त रूपमा प्रतिवेदन बुझाउने छन्। त्यसपछि टीअआरसी विधेयक संसदबाट पारित भएर कानुन बनाउने प्रक्रियातर्फ अघि बढ्छ।

कार्यदलस्तरमा मानवअधिकार उल्लंघन, सुरक्षाकर्मीका परिवारलाई राहत परिपूरण, बहिर्गमित लडाकु, गम्भीर मानव अधिकार उल्लंघनजस्ता विषयमा सहमति जुटेको बताइएको छ।