एउटै मञ्चमा देखिए प्रचण्ड-बाबुराम, भने- जनयुद्धको चर्चा युगयुगसम्म भइरहन्छ

काठमाडौँ- नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेपाल समाजवादी पार्टीका अध्यक्ष डा. बाबुराम भट्टराईले एउटै मञ्च सेयर गरेका छन्।

शुक्रबारदेखि प्रसारण हुन जनयुद्धका घटनाक्रममा आधारित टेलिफिल्म ‘राधाकृष्ण’को प्रिमियर शोमा उनीहरू दुवैले एकै मञ्च सेयर गरेका हुन् ।

दुवैले टेलिफिल्म हेरेका थिए। माओवादी नेतृत्वमा भएको दश वर्षे जनयुद्ध ठूलो ऐतिहासिक परिघटना भएको उनीहरूको जिकिर थियो। जनयुद्धको महत्त्वमाथि युगयुगसम्म चर्चा भइरहने उनीहरूको भनाइ थियो।

‘पृथ्वीनारायण शाहको नेपाल एकीकरणपछि लाखौं लाख जनता सहभागी भएर गरिएको कुनै राजनीतिक आन्दोलन छ भने त्यो माओवादी जनयुद्ध नै हो’, प्रचण्डले भनेका थिए, ‘लाखौं जनताले यसमा भाग मात्र लिएनन्, वर्षौदेखिको वर्गीय, जातीय, क्षेत्रीय, लैंगिक, भाषिक उत्पीडनको अन्त्य भएर समतामूलक समाज निर्माणको नयाँ आधार खडा भएको छ, यति ठुलो आन्दोलन ल्याटिन अमेरिकी मुलुक वा यूरोपतिर भएको हुन्थ्यो भने विश्वव्यापी परिवर्तनको घटनाको रूपमा दर्ज भइसक्ने थियो।’

नेसपाका अध्यक्ष डा. भट्टराईले जनयुद्ध नेपाल राज्य बनेयताको सबैभन्दा ठूलो परिघटना भएको औँल्याए। ‘सुगौली सन्धिअघिको राज्य विस्तारको क्रममा टिस्टादेखि काँगडासम्म महिला बालबालिकालगायत सबै नेपालीले आन्दोलनमा भाग लिएका थिए, त्यसयता लाखौं जनता कुनै अभियानमा सहभागी भएका थिए भने त्यो जनयुद्ध नै हो,’ उनले भनेका थिए, ‘यो यस्तो परिघटना हो, जहाँ देशैभरि सबै तह तप्काका जनताले भाग लिए।’

जनयुद्धकै कारण आज संघीय लोकतान्त्रिक गणतन्त्र स्थापना भएको चर्चा गर्दै डा. भट्टराईले जनयुद्धका क्रममा भएका कतिपय घटनालाई लिएर मूल पक्षलाई ओझेलमा पार्ने प्रयास गर्नु इतिहासप्रतिको सही मूल्यांकन नहुने बताए।

कार्यक्रममा टेलिश्रृङ्खला ‘राधाकृष्ण’ले जनयुद्धको यथार्थ पक्ष उजागर गर्ने बताउँदै हरेक शुक्रबार साँझ प्रसारण हुने जानकारी दिए।

कार्यक्रममा हास्यकलाकार जितु नेपाललगायतले शुभकामना दिएका थिए।

माओवादी आफूहरुले १० वर्षसम्म गरेको सशस्त्र संघर्षलाई जनयुद्ध भन्न मन पराउँछ। तर एमालेका नेता योगेश भट्टराईले भदौ १२ गते प्रतिनिधि सभामा त्यसलाई माओवादी हिंसा भनेका थिए। माओवादी सांसदले आफूहरूले गरेको संघर्षलाई हिंसा भनिएको भन्दै आपत्ति जनाएर उक्त शब्द संसदको रेकर्डबाट हटाउन माग गरेका थिए।

गत बुधबार प्रतिनिधि सभाका सभामुख देवराज घिमिरेले हिंसा शब्द असंसदीय नभएकाले हटाउन नपर्ने निर्णय सुनाएपछि माओवादीले पुन: विरोध गरी सदनमा अवरोध खडा गरिरहेको छ।

तर एमाले सांसदहरूले योगेशको बचाउ गर्न खोज्दा माओवादी सांसद र एमाले सांसदबीच चर्काचर्की, गालीगलौज र भनाभन भएको थियो।

माओवादी सांसदको विरोध साम्य नभएपछि सभामुखले प्रतिनिधि सभा बैठक भाद्र ३० गतेसम्मका लागि स्थगित गरेका छन्।