अवरुद्ध सडक खुलाउन कांग्रेस समन्वयको माग

काठमाडौँ- नेपाली कांग्रेसको ‘शुभेच्छुक संस्था समन्वय विभाग’ले अवरुद्ध राजमार्ग खुलाउन सरकारसँग माग गरेको छ। सडक र पुलको चाँडो मर्मतसम्भार गरी सहज यातायातको व्यवस्था गर्न विभागले माग गरेको हो।

नेपाली कांग्रेसका केन्द्रीय सदस्यसमेत रहेका विभाग प्रमुख अब्दुल सतारले विज्ञप्ति जारी गर्दै चाडबाडको समय भएकाले त्यसअघि नै राजमार्गमा सहज आवतजावतको व्यवस्था गर्न माग गरेका हुन्।

‘नेपालीहरुको महान् पर्व विजयादशमीको पूर्वसन्ध्यामा भएको यस अकल्पनिय घटनाले कयौं जनताहरुमा त्रास उत्पन्न भएको छ । कयौं जनता चाडपर्व मनाउन आफ्नो घर जान पाइँदैन कि भन्ने चिन्तामा हुनुहुन्छ,’ विभाग प्रमुख सतारको हस्ताक्षर भएको विज्ञप्तिमा भनिएको छ, ‘यस विषम परिस्थितीमा बाढीपहिरोबाट सुरक्षा निकाय र सडक विभागको समन्वयमा अवरुद्ध राजमार्ग,सहायक मार्ग, तथा पुलको चाँडो मर्मतसम्भार गरि यातायातका साधन सुरु गर्न माग गर्दछु।’

राष्ट्रिय विपद्को अहिलेको अवस्थामा विभागमा आवद्ध संघ, प्रदेश र स्थानीय तहमा रहेका शुभेच्छुक संस्थालाई आआफ्नो क्षेत्रबाट सहयोग गर्न पनि अनुरोध गरिएको छ।