सुकुटे पुगेर प्रचण्डले भने- म त ‘रिल्याक्स’ गरिराख्या छु, सरकार ढली नै हाल्छ

सुकुटे- नेकपा माओवादी केन्द्रका अध्यक्ष पुष्पकमल दाहाल प्रचण्डले वर्तमान सरकार आफैँ ढल्ने बताएका छन्। यस सरकार धेरै दिन नटिक्ने भएकाले आफू रिल्याक्सको मुडमा गरिरहेको पनि उनको भनाइ छ।

सिन्धुपाल्चोकको सुकुटेमा पत्रकारहरूसँग कुराकानी गर्दै प्रचण्डले वर्तमान सरकार अप्राकृतिक गठबन्धनबाट बनेकाले यसको आयु लामो नभएको जिकिर गरेका हुन्। कांग्रेसभित्रै असन्तुष्टि र सरकारका अलोकप्रिय कामका कारण पनि सरकारको आयु कम भएको उनको भनाइ थियो।

‘अप्राकृतिक भएको हुनाले अन्ततः यो ढल्नु नै छ। ढली नै हाल्छ। हामीले धेरै बलै गर्नुपर्दैन। यसको आयु धेरै छ जस्तो चाहिँ मलाई लाग्या छैन,’ प्रचण्डले भने, ‘मैले मिति त तोक्न सक्ने कुरा पनि होइन, मिल्ने कुरा पनि होइन। कांग्रेसभित्रै सरकारप्रति जबर्जस्त असन्तुष्टि, धेरै नेताहरुको, संस्थापनमै भएका नेताहरुको पनि असन्तुष्टि बाहिर आई नै सकेको छ। त्यो स्थितिमा यो सरकार सहज ढंगले जाने अवस्था छैन।’

उनले अहिले आफूले ‘रिल्याक्स’ गरिरहेको बताए। ‘हाम्रो पार्टीले अहिले नै सरकार गिराउने, तुरुन्तै सरकारमा जाने भनेर एक्सरसाइज गरेका छैनौं। तपाईंहरु प्रष्ट हुनुहोला। हामी अहिले जनताको बीचमा संगठन सुदृढ गर्ने अभियानमा छौं,’ उनले भने, ‘स्थानीय तहदेखि नै भेला सम्मेलन भैराख्या छन्। हामीले पनि रिल्याक्स गर्‍या छौँ।’

तर यो सरकार टिकिराखोस् भन्ने चाहना आफूहरुको नरहेको प्रचण्डले बताए। ‘अप्राकृतिक, अलोकतान्त्रिक र असंवैधानिक भनिसकेपछि त्यो रहिराखोस् भन्ने हाम्रो चाहना हुँदैन,’ उनले भने।