बार काउन्सिल निर्वाचनका लागि ५ दलनिकटका वकिलले बनाए गठबन्धन

काठमाडौँ- नेपाल बार काउन्सिलको निर्वाचनका लागि ५ दल निकटका कानुन व्यवसायीले गठबन्धन गर्ने भएका छन्।

एमालेनिकट पीपीएलएका अध्यक्ष भोजराज आचार्य, माओवादीनिकट आरपीएलएका अध्यक्ष रमण कुमार श्रेष्ठ, विप्लव नेकपानिकट पीएलएका अध्यक्ष कपिलचन्द्र पोखरेल, मोहन वैद्यनिकट एनपीएलएका अध्यक्ष देवकुमार मोक्तान र जसपानिकट एफएलएका अध्यक्ष दीपक राईले गठबन्धन बनाउन सहमति गरेका छन्।

बार काउन्सिल पार्षद पदको निर्वाचनमा एमाले तथा माओवादीका उम्मेदवारलाई जिताउने र त्यसपछि फागुन २३ मा हुने नेपाल बार एसोसिएसनको निर्वाचनमा साझा उम्मेदवार बनाएर जाने बिहीबार सहमतिमा उल्लेख छ।

बार काउन्सिलको निर्वाचन माघ २६ गते हुने कार्यतालिका छ। निर्वाचनमा सातै प्रदेशमा एमाले माओवादी गठबन्धनका उम्मेदवारलाई मतदान गर्ने सहमति भएको छ। सातमध्ये ५ प्रदेशमा एमाले र २ प्रदेशमा माओवादीनिकट उम्मेदवार छन्।

गठबन्धनमा राष्ट्रिय स्वतन्त्र पार्टीनिकट संगठनलाई पनि समावेश गर्ने तयारी भइरहेको छ। संगठनका अध्यक्ष यज्ञमणि न्यौपानेले आफूहरू छलफलमा रहेको बताए।

नेकपा एसनिकट एसपीएलएले भने बार काउन्सिल निर्वाचनमा कांग्रेसलाई समर्थन गरेको छ। नेकपा एसले बार एसोसिएसन निर्वाचनमा पनि कांग्रेससँग मिलेर जाने तयारी गरेको छ।

नेपाल बारमा वामपन्थी तथा देशभक्त र स्वतन्त्रहरुको गठबन्धनबाट एमालेनिकट पीपीएलएमा आबद्ध वरिष्ठ अधिवक्ता तथा पूर्व उपाध्यक्ष टीकाराम भट्टराई उम्मेदवार बन्ने सम्भावना छ। उता माओवादीनिकट आरपीएलएले रमण श्रेष्ठलाई अध्यक्षमा उठाउने तयारी गरेको छ।