रवि पार्टी कार्यालय पुग्दा समर्थकको भिड, के भने सम्बोधनमा?

काठमाडौँ – राष्ट्रिय स्वतन्त्र पार्टी (रास्वपा)का सभापति रवि लामिछाने सोमबार पार्टी कार्यालय पुगेका छन्। लामो समयपछि राजनीतिमा फर्किएका उनलाई स्वागत गर्न समर्थकहरूको उल्लेख्य भिड देखियो।

समर्थकहरूमाझ उनले खुलेर आफ्नो धारणा राख्दै आफूविरुद्ध झुटा मुद्दा लगाएर फसाइएको बताए। ‘तिमीहरूले दिनुभएको माया र विश्वासलाई बेचेर खान्नँ, सत्ताले सुनोस्— रवि लामिछाने किस्तीमा आएको प्रधानमन्त्री पद त्यागेर कैदी हुन मञ्जुर भएको मान्छे हो,’ उनले भने।

आफूले कुनै पनि हालतमा शिर नझुकाउने अडान लिएका छन्। ‘प्रधानमन्त्री भए सिंहदरबारमा फोटो टाँसिन्थ्यो होला, तर यिनीहरूसँग शिर झुकाएको भए मन्त्री, प्रधानमन्त्री हुन्थेँ होला, सरकार पनि ढल्दैनथ्यो होला। तर ज्यान जाला, यिनका अघि शिर झुकाउँदिनँ,’ उनले भने।

आगामी चुनावमा आफू उम्मेदवारी नदिने संकेत गर्दै राम्रा उम्मेदवारहरूलाई ठाउँ दिने बताएका छन्। सत्तारूढ कांग्रेस–एमाले सरकारको औचित्य समाप्त भइसकेको दाबी गरे।

सरकारले फेरि पनि आफूलाई थुन्ने सम्भावना रहेको बताउँदै भने, ‘म जुनसुकै शक्तिसँग लड्छु, तर लुटतन्त्र टुलुटुलु हेरेर बस्दिनँ। षड्यन्त्र गर्न अझै बाँकी छ भने सरकारले गरोस्।’

‘जहाँ आगो बलेको छ, त्यहाँ ताप्न रास्वपा आएको होइन,’ भन्दै पार्टीको स्वतन्त्र धारा बलियो रहेको प्रष्ट पारे।

लोकतन्त्र जोगाउन दह्रो प्रतिपक्ष आवश्यक रहेको र रास्वपा परिवर्तनको पक्षमा दृढ रूपमा उभिएको बताए।

सरकार र अन्य शक्तिहरूले रास्वपालाई कमजोर पार्ने वा विभाजित गर्ने प्रयास गरिरहेको आरोप लगाए।

‘दुइटा ठूला दल मिलेर बनेको सरकार सफल हुँदैन। दुइटा चोर मिलेर साधु हुँदैन,’ उनले कटाक्ष गरे।

रवि लामिछानेको पुनः सक्रियताले रास्वपाको आगामी रणनीति कस्तो बन्छ भन्ने चासो बढेको छ।