अर्थमन्त्रीले सदनमा पेस गरे आर्थिक सर्वेक्षण, संस्थान निजीकरण गर्ने योजना

काठमाडौँ– अर्थमन्त्री डा प्रकाशशरण महतले प्रतिनिधिसभामा चालु आर्थिक वर्षको आर्थिक सर्वेक्षण प्रस्तुत गर्दैछन्। आइतबारको बैठकमा मन्त्री महतले सर्वेक्षण पेस गरेका हुन्।

चालु आर्थिक वर्षका सूचकांक तथा समग्र कार्यान्वयनको पक्ष आर्थिक सर्वेक्षणले समेटेको छ। आगामी आर्थिक वर्षको बजेट आउनुअघि मन्त्री महतले सर्वेक्षण पेस गरेका हुन्।

हालसम्म ३४ हजार १०० किमी सडक बनेको सर्वेक्षणले उल्लेख गरेको छ। वर्षामा विद्युत निर्यात हुन थालेको र आधारभूत तहमा खुद भर्नादर बढेकोलगायतका विषय सर्वेक्षणले समेटेको मन्त्री महतको भनाइ छ।

यसका साथै सार्वजनिक संस्थानको वार्षिक स्थिति समीक्षा पनि पेस गरेका छन्। सन् २०२३ मा आर्थिक गतिविधिमा सुस्तता आएको उनले उल्लेख गरेका छन्।

सञ्चालन र व्यवस्थापनमा कमजोरीका कारण संस्थानको स्थिति सकारात्मक नभएको उनको भनाइ छ। सरकारी लगानी रहेकामध्ये २५ वटा नाफामा पुगेको उनको भनाइ थियो। यस्तै संस्थानमा भएको लगानीबाट सरकारले १ प्रतिशत लाभांश पाएको समेत उनले जानकारी दिए। उनले घाटामा सञ्चालनमा रहेका संस्थानलाई क्रमश निजीकरण गर्दै लैजाने समेत उल्लेख गरेका छन्।

अर्थमन्त्री डा महतले दुई दर्जन बोर्ड तथा समिति खारेज गर्ने गरी बजेट ल्याउने तयारी गरेका छन्। सदनमा बजेट प्रस्तुत गर्न सोमबार साँझ ६ बजे बैठक बोलाइएको छ।