सभामुखको भूमिकामा पनि प्रश्न उठायो ‘कुलिङ’ले

काठमाडौँ- निजामती सेवा विधेयकमा कुलिङ पिरियडसम्बन्धी व्यवस्थामा भएको चलखेलका विषयमा सभामुख देवराज घिमिरेको भूमिकामाथि पनि प्रश्न उठेको छ। नेकपा माओवादी केन्द्रले सभामुखको भूमिकामा प्रश्न उठाएको हो।

पार्टी कार्यालय पेरिसडाँडामा आयोजित पत्रकार सम्मेलनमा बोल्दै प्रवक्ता अग्निप्रसाद सापकोटाले सहमतिभन्दा फरक गरेर विधेयक पारित भएको विषयमा छानबिन गर्न माग पनि गरेका छन्। ‘यस (निजामती सेवा विधेयकमा कुलिङ पिरियडसम्बन्धी व्यवस्था चलखेल)को जिम्मा नैतिक रूपमा संसदको नेतृत्व (सभामुख)समेतले लिनुपर्दछ। यस प्रकारको गम्भीर प्रकृतिको संसदीय अपराधको यथाशक्य छिटो छानबिन गरी सत्य तथ्य सार्वजनिक गर्नुका साथै दोषीमाथि कारबाही गरिनुपर्दछ,’ सापकोटाको भने।

सापकोटाले निजामती विधेयकमा भएको चलखेलका विषयमा सिंगो संसदको इमान, निष्ठा र योग्यतामाथि प्रश्न उठाएको टिप्पणी गरे। विधेयक कार्यसूचीमा समावेशदेखि पारित गर्ने क्रमसम्म विचार गर्दा एकाध व्यक्तिको मात्र दुस्साहस नभई सुनियोजित धृष्टता भएको उनको जिकिर छ।

‘प्रतिनिधिसभाको राज्य व्यवस्था तथा सुशासन समितिमा संघीय निजामती सेवा विधेयकमा कुलिङ पिरियडसम्बन्धी जे सहमति भएको थियो, सदनमा प्रस्तुत र पारित हुँदा भने फरक पारिएको छ,’ उनले भने, ‘सहमतिभन्दा फरक गरेर विधेयक सदनमा कसरी पुर्‍याइयो? परस्पर विरोधी प्रावधान कसले थप्यो? यस्ता अनेकन गम्भीर प्रश्न उठेका छन्। यस जालसाजीपूर्ण घटनाले सिंगो संसद, संसदीय समिति र सांसदहरूको इमान, निष्ठा र योग्यतामाथि पनि प्रश्न उठेको छ। संसदमाथिको धोका, मानमर्दन र अपमान भएको यस घटनाले संविधानको मर्म र भावनामा गम्भीर चोट पुर्‍याएको छ। सुशासनका लागि कोशेढुङ्गा सावित हुने जनताको अपेक्षाविपरीत गम्भीर विश्वासघात हुनुका साथै यस प्रकारको जालसाजीले संसदीय मूल्य-मान्यतालाई ठाडो चुनौतीसमेत दिएको छ।’