उपाधि दावेदार मछिन्द्र पुलिससँग पराजित

काठमाडौं – सहिद स्मारक ए डिभिजन लिगको दोस्रो स्थानमा रहेको मछिन्द्र क्लबले हार बेहोरेको छ। आइतबार च्यासल रंगशालामा सम्पन्न भएको खेलमा नेपाल पुलिस क्लबले मछिन्द्र फुटबल क्लबलाई २–१ ले हराएको छ ।

पुलिसलाई जित दिलाउनका लागि मोसेस ग्याबाह त्वामले दुई गोल गरेका थिए भने मछिन्द्रका आफिज ओलावालेले एक गोल फर्काएका थिए।

खेलको २७ औं मिनेटमा ओलावालेले गोल गर्दै मछिन्द्रलाई सुरुआती अग्रता दिलाएका थिए। यससँगै मछिन्द्रले खेलको ७४ औं मिनेटसम्म अग्रता कायम गरेको थियो। तर, पुलिसले सो गोलको अग्रता उल्टाएर मछिन्द्रलाई हराएको हो।

७५ औं मिनेटमा मोसेसले फ्रिकिक मार्फत गोल गर्दै पुलिसलाई १–१ गोलको बराबरीमा ल्याए। साथै खेलको ८१ औं मिनेटमा मोसेसले दोस्रो गोल गर्दै पुलिसलाई २–१ को जित दिलाएका हुन्।

लिगमा सुरुआतबाट निकै खराब प्रदर्शन गरेको पुलिसको यो ११ औं जितसमेत हो। उसले अहिले २४ खेलमा ३७ अंक बनाएको छ। यता लिगको दोस्रो स्थानमा रहेको मछिन्द्रले हार बेहोरेपछि भने उसको उपाधि यात्रामा धक्का लागिेको छ। किनभने शीर्षस्थानको चर्च बोइज उभन्दा पाँच अंकले अघि पुगिसकेको छ। अब चर्च बोइज उपाधिभन्दा एक जितमात्र पछि छ।

मछिन्द्र २४ खेलमा ३९ अंक जोडेर दोस्रो स्थानमा रहेको छ।

त्यसैगरी, आइतबार नै भएको अर्को खेलमा संकटा क्लबले खुमलटार क्लबमाथि ३–० को सहज जित निकालेको निकालेको छ।

एन्फा कम्प्लेक्समा सम्पन्न भएको खेलमा संकटालाई जित दिलाउन निशान खड्का, आयुष घलान र चन्दन कुमार दासले एक एक गोल गरेका थिए।

जितसँगै संकटाले २४ खेलमा ३० अंक जोडेको छ भने खुमलटार २४ खेलमा २४ अंक जोडेर पुछारमा रहेको छ।