उपाधि विजेताको टुंगो लागेपछि ए डिभिजन लिगले पायो मुख्य प्रायोजक

काठमाडौं – सहिद स्मारक ए डिभिजन लिगको न्तिम १० खेल बाँकी रहँदा अखिल नेपाल फुटबल संघ एन्फाले  लिगको लागि मूख्य प्रायोजक पाएको छ। एन्फाका प्रवक्ता सुरेश साहले लिगको अन्तिम समयमा भए पनि संघले मूख्य प्रायोजक पाएको जानकारी दिएका हुन्।

‘पहिले देखिको नै प्रायोजक भइरहेको कारण हामीले कतार एयरवेजलाई धेरै प्रस्ताव गरेको थियौँ। तर अहिले अन्तिम चरणमा आएर सम्झौता भएको हो,’ प्रवक्ता साहले भने।

उनले यो वर्षको लागि ५० हजार अमेरिकी डलर(६६ लाख रुपैयाँ) मा सहमति भएको जानकारी दिएका छन्। त्यस्तै एन्फाले अर्को वर्षको लिगको लागि कतारसँगै डेढ लाख अमेरिकी डलरमा सम्झौता गर्ने विषयमा पनि छलफल भएको छ। कतारले सँधैजसो डेढ लाख डलर दिँदै आएकोमा यो वर्ष भने ५० हजार मात्र दिने भएको हो।

कतार एयरवेजले प्रस्ताव ढिलो स्विकार गरेको विषयामा केही भनेको छैन। प्रायाेजन सम्झौता सम्बन्धि कुराको कारण यो सम्झैता ढिलो भएको हो। कतार एयरवेजले पछिल्लो केही संस्करणयता नेपालको लिगलाई स्पोन्सर गर्दै आइरहेको छ। साथै साहले लिगको बि र सी डिभिजनको लागि पनि कतारले स्पोन्सर गर्ने जानकारी दिएका छन्।

अहिले सहिद स्मारक ए डिभिजन लिगमा अन्तिम चरणका खेल मात्र बाँकी रहेका छन् भने चर्च बोइज क्लबले उपाधि जितिसकेको छ।