प्रधानमन्त्री सुर्खेत गएपछि राष्ट्रिय सभा बैठक सर्‍यो, प्रतिनिधि सभामा अवरोध गर्ने तयारी

काठमाडौँ- राष्ट्रियसभा बस्ने तय भएको बैठक भोलि बिहानका लागि सरेको छ। बिहान ११:११ बजेका लागि तय भएको बैठक विशेष कारणवस बुधबार बिहान ११:११ बजे बस्ने भएको सङ्घीय संसद् सचिवालयले जानकारी दिएको हो।

आजका लागि निर्धारित बैठकमा प्रधानमन्त्री पुष्पकमल दाहाल‘प्रचण्ड’ले समसामयिक विषयमा वक्तव्य दिने सम्भावित कार्यसूची थियो। उनी सवारी दुर्घटनामा निधन भएकी उपप्रधानमन्त्री तथा रक्षामन्त्री पूर्णबहादुर खड्काकी माइली भाइबुहारी डा सञ्जु खाती खड्काप्रति श्रद्धाञ्जली अर्पण गर्न सुर्खेत पुगेपछि आजको बैठक स्थगित भएको हो।

प्रधानमन्त्री दाहालले आज बिहान उपप्रधानमन्त्री खड्काको सुर्खेतस्थित निवासमा पुगेर उहाँप्रति श्रद्धाञ्जली अर्पण गरेका छन्। उनीसँगै उप्रधानमन्त्री तथा गृहमन्त्री नारायणकाजी श्रेष्ठ पनि सुर्खेत पुगेका थिए। यही जेठ १६ गते बाँकेको राप्तीसोनारी गाउँपालिका–८ ठुडिया खोला नजिकै खड्का सवार कारलाई बसले ठक्कर दिँदा उहाँको निधन भएको थियो।

राष्ट्रिय सभाको बैठकमा अर्थमन्त्री डा प्रकाशशरण महतले आर्थिक वर्ष २०८०/८१ को राजस्व र व्ययको अनुमानमाथि सामान्य छलफल गरियोस् भन्ने प्रस्ताव समेत प्रस्ताव गर्ने कार्यसूची थियो। यो कार्यक्रम पनि अब भोलिका लागि सरेको छ।

उता प्रतिनिधि सभा बैठकमा भने अवरोध गर्ने तयारी नेकपा एमाले र राष्ट्रिय प्रजातन्त्र पार्टी (राप्रपा)ले गरेका छन्। करको दर हेरफेरमा अनधिकृत व्यक्तिको संलग्नता रहेको भनी उठेको विषयमा सरकारको जवाफ माग गर्ने उनीहरूको तयारी छ।

प्रतिनिधिसभा बैठकअघि राप्रपा र एमालेले यस्तो जानकारी गराएका हुन्। यो विषयको वास्तविकता फरक रहेको भन्दै सत्तारुढ दलहरुले प्रतिवाद गरिरहेको छन्।

मंगलबारको बैठकमा बजेटमाथि छलफल गर्ने कार्यसूची थियो। यसका लागि ११ बजेका लागि बोलाइएको बैठक यो समाचार तयार पार्दाको समय (दिउँसो १२:१५ बजे)मा पनि सुरु हुन सकेको छैन।

अर्थमन्त्री डा प्रकाशशरण महतले भने भन्सारका दर र हार्मोनाइज्ड कोड बुझेको भएकाले पूर्वनासु रामकृष्ण श्रेष्ठलाई जेठ १४ गते राति मन्त्रालयमा बोलाइएको बताएका छन्। यस्तै श्रेष्ठले ३० वर्षयता आफूले नछुटाई बजेटमा काम गर्दै आएको बताएका छन्।